مەكسيكالىق بوكسشى ساۋل «كانەلو» الۆارەستٸڭ (49-1-2, 34 كو) ٸسٸن جٷرگٸزەتٸن Golden Boy Promotions پروموۋتەرلٸك كومپانيياسى ورتا سالماقتاعى WBC, WBA (Super) جەنە IBO نۇسقاسى بويىنشا ەلەم چەمپيونى گەنناديي گولوۆكينگە (38-0-1, 34 كو) قارىمتا كەزدەسۋدەن تٷسكەن تابىستى بٶلۋگە قاتىستى جاڭا ۇسىنىس ايتتى, دەپ حابارلايدى Baq.kz اقپارات اگەنتتٸگٸ Vesti.kz پورتالىنا سٸلتەمە جاساپ.
قوس بوكسشى اراسىنداعى جەكپە-جەك وسى جىلدىڭ قىركٷيەگٸندە ٶتۋٸ مٷمكٸن.
Golden Boy Promotions اتالعان كەزدەسۋدەن تٷسەتٸن تابىستى الۆارەستٸڭ پايداسىنا 57,5-تە 42,5 دەپ بٶلۋدٸ ۇسىنىپ وتىر. بۇل تۋرالى اتالعان كومپانييانىڭ پرەزيدەنتٸ ەريك گومەس ESPN تەلەارناسىنا بەرگەن سۇحباتىندا مەلٸمدەدٸ.
الايدا ولار گولوۆكينگە شەشٸم قابىلداۋعا از ۋاقىت بەرگەن. قازاقستاندىق بوكسشى اتالعان ۇسىنىستى تىنىق مۇحيت ۋاقىتىمەن 12 ساعاتتان كەشٸكپەي قابىلداۋى تيٸس (استانا ۋاقىتىمەن 14 ماۋسىم, تٷنگٸ ساعات 01:00-گە دەيٸن). ەگەر گولوۆكين بۇل ۇسىنىستى قۇپ كٶرمەسە, الۆارەس كەزەكتٸ جەكپە-جەكتٸ ٶتكٸزۋ ٷشٸن اقش-تىڭ ەكس-چەمپيونى دەنيەل دجەيكوبسپەن (34-2, 29 كو) كەلٸسٸمگە قول قويادى. تٸپتٸ مەكسيكالىق بوكسشى 15 قىركٷيەككە لاس-ۆەگاس قالاسىنداعى T-Mobile ارەناسىن برونداپ قويعان.
وسى ورايدا مەكسيكالىق بوكسشى ساۋل «كانەلو» الۆارەستٸڭ پروموۋتەرٸ Golden Boy Promotions كومپانيياسىنىڭ پرەزيدەنتٸ ەريك گومەس قازاقستاندىق گەنناديي گولوۆكينگە قويعان تالاپقا قاتىستى ٶز پٸكٸرٸن بٸلدٸردٸ. ونىڭ ايتۋىنشا, ولار گولوۆكينگە قىركٷيەكتە بولۋى مٷمكٸن قارىمتانىڭ كٸرٸسٸن بٶلٸسۋ تۋرالى سوڭعى ۇسىنىستارىن ايتقان.
«بۇل - سوڭعى ۇسىنىس. بٸز بارلىق كەدەرگٸدەن ٶتتٸك, ەندٸ ەشقانداي كەزدەسۋ بولمايدى. گولوۆكين تٷسكە دەيٸن شەشٸم قابىلداسىن نەمەسە باس تارتادى. باس تارتسا – جولى بولسىن. قارىمتانى ٶتكٸزۋ ٷشٸن بارىمىزدى سالىپ جاتىرمىز. كانەلو «بۇل جەكپە-جەكتٸ جانكٷيەرلەر ٷشٸن ٶتكٸزگٸسٸ كەلەدٸ, سول ٷشٸن عانا جەڭٸلدٸكتەرگە باردىق», - دەيدٸ ەريك گومەس.
سونىمەن قاتار ول قارىمتا كەزدەسۋدەن تٷسەتٸن پايدانىڭ تەڭ بٶلٸنەتٸنٸن اتاپ ٶتٸپ, ونىڭ بۇل جاعدايمەن كەلٸسپەيتٸنٸن اشىق ايتتى.
«باستاپقىداعى كەلٸسٸم گولوۆكينگە ٷلەستٸڭ 35 پايىزىن بەرۋ ەدٸ. بٸراق كەيٸن ول 50-50 العىسى كەلدٸ. بۇل كٷلكٸلٸ. قارسى ۇسىنىس جاساۋ ٷشٸن بٸز جەڭٸلدٸككە بارۋعا دايىنبىز. الايدا سەيسەنبٸدە توم لەففلەرگە قوڭىراۋ شالىپ, ولاردا شەشٸم قابىلداۋعا 24 ساعات بارىن ايتتىم. ەيتپەسە بٸز دەنني دجەيكوبسپەن جۇدىرىقتاسامىز. ول گولوۆكينمەن سٶيلەسٸپ, كٶندٸرۋگە تىرىساتىنىن ايتتى. قازٸر گولوۆكينگە ٶتە ٷلكەن قارجى ۇسىنىلىپ وتىر. ەگەر ول باس تارتسا, مۇنشا اقشانى باسقا جەردەن ەشقاشان كٶرمەيدٸ. بۇل مەسەلە تالاي رەت سٶز ەتٸلدٸ», - دەيدٸ Golden Boy Promotions كومپانيياسىنىڭ پرەزيدەنتٸ.
ەستەرٸڭٸزگە سالا كەتەيٸك, گولوۆكين مەن «كانەلو» اراسىنداعى العاشقى جەكپە-جەك 2017 جىلدىڭ 16 قىركٷيەگٸندە لاس-ۆەگاستاعى T-Mobile ارەناسىندا ٶتٸپ, تٶرەشٸلەر شەشٸمٸ بويىنشا كەزدەسۋ تەڭ اياقتالعان.
ول كەزدە قازاقستاندىق بوكسشى تٷسكەن تابىستىڭ 30%-ٸن عانا العان.
