حوككەيدەن جاستار اراسىنداعى ەلەم چەمپيوناتىنا بارعان رەسەي كومانداسى كانادانىڭ كالگاري قالاسىنان 1 قاڭتاردا ەۋروپاعا قايتا المادى. ويىنشىلار مەن جاتتىقتىرۋشىلاردى "بەتپەردە تاعۋ تالابىن ورىنداماعانى" جەنە "ۇشاققا وتىرار كەزدە تەمەكٸ تارتقانى" ٷشٸن ۇشاققا وتىرعىزباعان, دەپ حابارلايدى ازاتتىق.
رەسەيلٸكتەرمەن بٸر ۇشاقتا چەحييا قۇراماسى دا ەۋروپاعا قايتۋى تيٸس ەدٸ. رەسەي كومانداسىنىڭ باس باپكەرٸ سەرگەي زۋبوۆتىڭ "ماتچ تۆ" تەلەارناسىنا تٷسٸندٸرۋٸنشە, ەكٸ كومپاندانىڭ دا كەيبٸر ويىنشىلار بەتپەردەنٸ دۇرىس تاقپاعان.
چەحييا جاستار قۇراماسىنىڭ مەنەدجەرٸ وتاكار چەرنى ەۋە رەيسٸنەن شەتتەتۋگە رەسەيلٸك حوككەيشٸلەردٸڭ قىلىعى سەبەپ بولدى دەيدٸ. ونىڭ سٶزٸنشە, سپيرتتٸك ٸشٸمدٸك ٸشٸپ العان رەسەيلٸكتەر سانيتارلىق تالاپتى ورىنداماعان دەپ حابارلادى چەحتىڭ Sport.cz باسىلىمى. رەسەي دەلەگاتسيياسىنىڭ بٸر مٷشەسٸ ۇشاققا مٸنەتٸن ورىندا تۇرىپ تەمەكٸ تارتقان. "ەكيپاج چەحتاردى ورىستارعا ۇقساتقاندىقتان, ۇشاققا وتىرعىزباي قويدى" دەپ تٷسٸندٸرگەن چەرنى.
رەسەيلٸك سپورت جۋرناليسٸ پاۆەل لىسەنكوۆ بولسا چەحتار ماس بولعان دەيدٸ. ال تەمەكٸ تارتقان ادام – رەسەي كومپانداسىنىڭ باس باپكەرٸ سەرگەي زۋبوۆ, دەپ حابارلادى جۋرناليست Telegram ەلەۋمەتتٸك جەلٸسٸندە. رەسەيلٸك "يزۆەستييا" باسىلىمىنا ۇشاقتا بولعان وقيعا جايلى تاعى بٸر ادام (اتى-جٶنٸن اتاعىسى كەلمەگەن) دا سولاي دەپ ايتقان.
رەسەي قۇراماسى كەلەسٸ ەۋە رەيسٸمەن كانادادان ۇشىپ كەتكەن.
وتاكار چەرنى Air Canada كومپانيياسى ٶكٸلدەرٸ چەحييا كومپانداسىنان كەشٸرٸم سۇراپ, ولاردى 1 قاڭتاردا قوناقٷيگە ورنالاستىرىپ, فرانكفۋرت قالاسىنا (گەرمانييا) دەيٸن ۇشاققا وتىرعىزۋعا جەردەمدەسكەنٸن حابارلادى.
رەسەيلٸك باس باپكەر زۋبوۆ تەمەكٸنٸ قويعانىنا ٷش جىل بولعانىن مەلٸمدەگەن. سپورتشىلار جاپپاي كوروناۆيرۋس جۇقتىرىپ العاندىقتان, كاناداداعى جارىس ٶتكەن جوق.
