- 9 جاسار مەيٸرگٷلدٸڭ ٸشكٸ ٸستەر مينيسترٸ قالمۇحانبەت قاسىموۆقا جازعان ٶتٸنٸشٸ ورىندالدى. ول جاقىن كٷندەرٸ اتا-اناسىمەن قاۋىشاتىن بولدى, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
بۇل تۋرالى «نۇر وتان» پارتيياسىنىڭ رەسپۋبليكالىق قوعامدىق قابىلداۋ بٶلٸمٸنٸڭ كەڭەسشٸسٸ اۋىت مۇقيبەكۇلى مەلٸم ەتتٸ.
«ٸشكٸ ٸستەر مينيسترٸ مەيٸرگٷلدٸڭ ٶتٸنٸشٸ بويىنشا, قر سىرتقى ٸستەر مينيسترلٸگٸنٸڭ كونسۋلدىق دەپارتامەنتٸنە حات جازىپ, ٷرٸمجٸدەگٸ كونسۋلدىقتان سامەت ۇلاربەك پەن تۇرسىن ورالحانعا ەلٸمٸزگە كٸرۋ ۆيزاسىن بەرۋدٸ سۇراپتى. كەشە 22 جەلتوقساندا «نۇر وتان» پارتيياسىنىڭ قوعامدىق قابىلداۋ بٶلمەسٸنە ٷرٸمجٸدەگٸ مەيٸرگٷلدٸڭ اناسىنان تەلەفون ارقىلى قۋانىشتى حابار كەلدٸ. ولار ەلٸمٸز كونسۋلدىعىنان قازاقستانعا كەلۋ ۆيزاسىن الىپتى. ەندٸ ساناۋلى كٷندەردەن سوڭ, الماتىدا قالعان قىزىمەن امان-ەسەن قاۋىشادى. قانداسىمىز "نۇر وتان" پارتيياسىنا العىسىن جاۋدىرىپ جاتىر», - دەيدٸ اۋىت مۇقيبەكۇلى.
ەستەرٸڭٸزگە سالا كەتەيٸك, «نۇر وتان» پارتيياسىندا قوعامدىق قابىلداۋ ٶتكٸزگەن ەلٸمٸزدٸڭ ٸشكٸ ٸستەر مينيسترٸ قالمۇحانبەت قاسىموۆقا 9 جاسار مەيٸرگٷل ٶتٸنٸشپەن كەلگەن بولاتىن. ونىڭ اتا-اناسى ەلٸمٸزدٸڭ كٶشٸ-قون زاڭناماسىن بۇزعانى ٷشٸن قازاقستاننان شىعارىلعان ەدٸ. ال مەيٸرگٷل بٷگٸندە الماتىدا تۋىستارىنىڭ قولىندا قالعان. 2016 جىلعى 7 جەلتوقساندا «نۇر وتان» پارتيياسىنىڭ رەسپۋبليكالىق قوعامدىق قابىلداۋ بٶلمەسٸندە ٸشكٸ ٸستەر مينيسترٸ ق.قاسىموۆپەن ٶتكەن قابىلداۋدا مەيٸرگٷل ۇلاربەكقىزى الماتىدان كەلٸپ, مينيستردٸڭ قابىلداۋىندا بولدى. ٶتٸنٸشٸن ايتىپ, اتا-اناسىنىڭ تەزٸرەك قازاقستانعا ورالۋىنا راقىمشىلىق جاساۋىن سۇراعان ەدٸ.
.jpeg)