شەشەنستان باسشىسى رامزان قادىروۆ ايماق ٷكٸمەتٸنٸڭ وتىرىسىندا "بٸرەۋدٸڭ ار-نامىسىنا تيگەن" ينتەرنەت قولدانۋشىلاردى جازالاۋعا شاقىردى. بۇل تۋرالى سيۋجەتتٸ 5 قاراشادا "گروزنىي" تەلەارناسىنان كٶرسەتتٸ.
"ادامدار اراسىنا وت جاعىپ, ٶسەك-اياڭ, ۇرىس-كەرٸسپەن اينالىسقانداردى قۇرتۋ, قاماۋ, قورقىتۋ ارقىلى توقتاتپاساق, ەشتەڭە شىقپايدى" دەدٸ قادىروۆ. ونىڭ سٶزٸنە ەڭ بٸرٸنشٸ BBC-دٸڭ ورىس قىزمەتٸ نازار اۋدارعان.
قادىروۆ ار-نامىسقا تيگەندەردٸ "دٷنيە ٶرتەنٸپ كەتسە دە", تٸپتٸ "بارلىق مەملەكەتتٸڭ زاڭدارى تاپتالسا دا" قۋعىنداۋعا دايىن ەكەنٸن جەتكٸزگەن. ول سول ٷشٸن كەز كەلگەن جازاعا ريزا بولاتىنىن ايتقان.
"جارايدى, تٷرمەگە قاماسىن. ٶلتٸرسٸن. ال ٶلدٸڭ دەيٸك. مەنٸڭ جاسىم 45-تە, مىنا دٷنيەدە باسقا نە ٸستەۋٸم كەرەك" دەدٸ قادىروۆ.
قازان ايىندا رەسەيدٸڭ "نوۆايا گازەتا" باسىلىمى شەشەنستاندا تامىز ايىنان بەرٸ جوعارى لاۋازىمدى تۇلعالاردى (ولاردىڭ اراسىندا رامزان قادىروۆتىڭ جاقىندارى دا بار) "قۋعىنداۋ كامپانيياسى" باستالعانىن حابارلاعان. باسىلىم دەرەگٸنشە, قۇپييا ورىنداردا شەنەۋنٸكتەردٸ ازاپتاپ, ولاردان "ساتقىندىق ٸستەرٸ" تۋرالى جاۋاپ العان. ۇستالعاندار مەن ولاردىڭ تۋىستارىنىڭ بارلىق مٷلكٸن تارتىپ الىپ, قاراجاتتى احمات قادىروۆ اتىنداعى قورعا قايىرىمدىلىق رەتٸندە اۋدارۋعا مەجبٷرلەگەن. قۇپييا دەرەككٶزگە سٷيەنگەن باسىلىمنىڭ جازۋىنشا, ۇستالعان شەنەۋنٸكتەر اراسىندا شەشەنستاننىڭ تٶتەنشە جاعداي مينيسترٸ رۋسلان ياحەۆ, بۇرىنعى ورمان شارۋاشىلىعى مينيسترٸ ديكماگومەد مۋلاەۆ, بۇرىنعى ۆيتسە-پرەمەر حاليد ۆايحانوۆ بار.
