Sheshenstan basshysy Ramzan Qadyrov aimaq úkimetiniń otyrysynda "bireýdiń ar-namysyna tigen" internet qoldanýshylardy jazalaýǵa shaqyrdy. Bul týraly siýjetti 5 qarashada "Groznyi" telearnasynan kórsetti.
"Adamdar arasyna ot jaǵyp, ósek-aiań, urys-kerispen ainalysqandardy qurtý, qamaý, qorqytý arqyly toqtatpasaq, eshteńe shyqpaidy" dedi Qadyrov. Onyń sózine eń birinshi BBC-diń Orys qyzmeti nazar aýdarǵan.
Qadyrov ar-namysqa tigenderdi "dúnie órtenip ketse de", tipti "barlyq memlekettiń zańdary taptalsa da" qýǵyndaýǵa daiyn ekenin jetkizgen. Ol sol úshin kez kelgen jazaǵa riza bolatynyn aitqan.
"Jaraidy, túrmege qamasyn. Óltirsin. Al óldiń deiik. Meniń jasym 45-te, myna dúniede basqa ne isteýim kerek" dedi Qadyrov.
Qazan aiynda Reseidiń "Novaia gazeta" basylymy Sheshenstanda tamyz aiynan beri joǵary laýazymdy tulǵalardy (olardyń arasynda Ramzan Qadyrovtyń jaqyndary da bar) "qýǵyndaý kampaniiasy" bastalǵanyn habarlaǵan. Basylym dereginshe, qupiia oryndarda sheneýnikterdi azaptap, olardan "satqyndyq isteri" týraly jaýap alǵan. Ustalǵandar men olardyń týystarynyń barlyq múlkin tartyp alyp, qarajatty Ahmat Qadyrov atyndaǵy qorǵa qaiyrymdylyq retinde aýdarýǵa májbúrlegen. Qupiia derekkózge súiengen basylymnyń jazýynsha, ustalǵan sheneýnikter arasynda Sheshenstannyń tótenshe jaǵdai ministri Rýslan Iahev, burynǵy orman sharýashylyǵy ministri Dikmagomed Mýlaev, burynǵy vitse-premer Halid Vaihanov bar.
