"يران-يراك شەكاراسىنداعى كٷشتٸ جەر سٸلكٸنٸسٸنەن قازا تاپقاندار سانى 164 ادامعا جەتٸپ, جارالانعاندار سانى 1600-دەن اسىپ كەتتٸ" دەپ حابارلادى يران ٸشكٸ ٸستەر مينيسترلٸگٸ. ۆەدومستۆونىڭ 13 قاراشادا تاراتقان اقپاراتىنا قاراعاندا, قۋاتى 7,3 ماگنيتۋداعا جەتكەن زٸلزالادان كەرمانشاح پروۆينتسيياسى ەڭ كٶپ زارداپ شەككەن. زٸلزالا دٷمپۋٸ تٷركييادان كۋۆەيتكە دەيٸنگٸ ايماقتا سەزٸلگەن.
اقش گەولوگييالىق قىزمەتٸنٸڭ حابارلاۋىنشا, زٸلزالا وشاعى يراكتىڭ سولتٷستٸك-شىعىسىنداعى حالابدجا قالاسىنان وڭتٷستٸك-باتىسقا قاراي 32 كيلومەتر قاشىقتىقتا, جەردٸڭ 33,9 كيلومەتر تەرەڭدٸگٸندە تٸركەلگەن. تەگەران ۋنيۆەرسيتەتٸنٸڭ سەيسمولوگييالىق ورتالىعى اقپاراتىنا قاراعاندا, زٸلزالا جەرگٸلٸكتٸ ۋاقىت بويىنشا ساعات 21:48-دە بولعان.
يراننىڭ رەسمي اقپارات اگەنتتٸگٸ جەرگٸلٸكتٸ شەنەۋنٸككە سٸلتەمە جاساپ, زٸلزالا قۇرباندارىنىڭ سانى ارتۋى مٷمكٸن ەكەنٸن حابارلادى. يران بيلٸگٸ تٶتەنشە جاعدايلار قىزمەتٸ قۇتقارۋ جۇمىستارىنا 13 قاراشا تاڭ اتا كٸرٸسكەنٸن حابارلادى.
