يلييا يليننٸڭ جازا مەرزٸمٸ ٶزگەردٸ

حالىقارالىق اۋىر اتلەتيكا فەدەراتسيياسى (IWF) ٶزٸنٸڭ رەسمي سايتىندا يليا يليننٸڭ جازا مەرزٸمٸ ەكٸ جىل بولعانىن جارييالادى, دەپ جازادى Vesti.kz پورتالى. 

بۇعان دەيٸن يلين رۇقسات ەتٸلمەگەن دەرۋمەن قولدانعانى ٷشٸن 2008 جەنە 2012 جىلعى وليمپيادا ويىندارىنىڭ التىن جٷلدەسٸنەن ايىرىلعان بولاتىن. 

جەلتوقسان ايىندا قازاقستان اۋىر اتلەتيكا فەدەراتسيياسى IWF يليندٸ 2018 جىلدىڭ 10 ماۋسىمىنا دەيٸن شەتتەتكەنٸن جارييالاعان بولاتىن. بٸراق IWF رەسمي سايتىندا قازٸر يليننٸڭ جازا مەرزٸمٸ 2018 جىلدىڭ 19 قازانىنا دەيٸن دەپ كٶرسەتٸلٸپ تۇر. وسىلايشا, قازاقستاندىق اۋىر اتلەت 2020 جىلى توكيودا ٶتەتٸن وليمپيادا ويىندارىنا قاتىسا الادى. 

IWF رەسمي سايتىنداعى مەلٸمدەمەدە يليننٸڭ 2008 جىلعى وليمپيادا ويىندارىندا دوپينگ ەرەجەسٸن بۇزعاندىعىنا بايلانىستى ەشتەمە جازىلماعان. ونىڭ ەكٸ وليمپيادادا ەرەجەنٸ بۇزعانى بٸر ٸس رەتٸندە قاراستىرىلىپ جاتىر. ال ەگەر ەكەۋٸ ەكٸ بٶلەك قاراستىرىلاتىن بولسا, سپورتشى ٶمٸر بويىنشا سپورتتان شەتتەتٸلەتٸن ەدٸ. 

ايتا كەتەيٸك, يلين تەك وليمپيادا ويىندارىنىڭ التىندارىنان عانا ايىرىلىپ وتىر. ال ونىڭ ەلەم چەمپيوناتىندا (2005, 2006, 2011 جەنە 2014) جەنە ازييا ويىندارىندا (2006 جەنە 2010) العان التىندارى ٶزٸندە قالدى. 

ٶتكەن جىلدىڭ سوڭىندا سپورتشىنىڭ ٶزٸ جازا مەرزٸمٸ اياقتالعاننان كەيٸن سپورتقا قايتا ورالاتىنى تۋرالى ايتقان بولاتىن. 

ەسكە سالايىق, پەكين جەنە لوندونداعى وليمپيادا ويىندارىنىڭ دوپينگٸن قايتا تەكسەرۋدٸڭ قورىتىندىسى بويىنشا قازاقستان جەتٸ جٷلدەسٸنەن ايىرىلدى. تارقاتىپ ايتساق, پەكيندەگٸ وليمپيادادان يليننٸڭ التىن جٷلدەسٸ, يرينا نەكراسوۆانىڭ كٷمٸس جٷلدەسٸ جەنە مارييا گرابوۆەتسكايانىڭ قولا جٷلدەسٸ, ال لوندونداعى وليمپيادا ويىندارىنداعى يلين, سۆەتلانا پودوبەدوۆا, زۋلفييا چينشانلو جەنە ماييا مانەزانىڭ التىن جٷلدەلەرٸن الىپ قويدى. 

سٶيتٸپ IWF چينشانلو مەن مانەزانى 2018 جىلدىڭ 28 مامىرىنا دەيٸن, ال پودوبەدوۆانى سەگٸز جىلعا سپورتتان شەتتەتتٸ. بۇل سپورتشىلاردىڭ اراسىندا تەك چينشانلو عانا سپورتقا قايتا ورالۋعا نيەتتٸ.