حالىقارالىق بوكس فەدەراتسيياسى (IBF) قازاقستاندىق بوكسشى گەنناديي گولوۆكينندٸ (38-0-1, 34 كو) ەلەم چەمپيونى اتاعىنان ايىردى, دەپ حابارلايدى Sports.kz.
22 مامىردا سپرينگفيلدتە (اقش, نيۋ-دجەرسي شتاتى) ٶتكەن تىڭدالىمعا گولوۆكين جەنە IBF بەكٸتكەن ونىڭ مٸندەتتٸ قارسىلاسى ۋكراينالىق سەرگەي دەرەۆيانچەنكو (12-0, 10 كو) سونىمەن قاتار ەكٸ سپورتشىنىڭ كومانداسى قاتىستى.
IBF كوميسسيياسى ەكٸ تاراپتى دا تىڭداپ شىقتى. ول بٷگٸن گەننادييدٸ IBF بەلدٸگٸنەن ايىرۋ جٶنٸندە شەشٸم قابىلدادى. ٶيتكەنٸ ول 3 تامىزعا شەيٸن دەرەۆيانچەنكومەن كەزدەسۋدەن باس تارتتى.
ەسكە سالا كەتسەك, گولوۆكين ەكٸنشٸ مەرتە مەكسيكالىق ساۋل الۆارەسپەن (49-1-2, 34 كو) ايقاسۋى كەرەك بولعان. الايدا كەلٸسسٶزدەر قارجى كەلٸسپەۋشٸلٸگٸنە بايلانىستى تىعىرىققا تٸرەلدٸ. سونىمەن قاتار قازاقستاندىق WBO چەمپيونى بيللي دجو سوندەرسپەن (26-0, 12 كو) كەزدەسۋ جٶنٸندە جوسپار بولدى. الايدا ول 23 ماۋسىمدا تيتۋلىن قورعاۋ ٷشٸن مارتين ميۋررەيگە قارسى شىعۋدان باس تارتتى.
