گرۋزييادا سوڭعى تەۋلٸكتە 2 981 ادام كوروناۆيرۋس جۇقتىردى. بۇل جايىندا ۆەدومستۆوارالىق ٷيلەستٸرۋ كەڭەسٸنە قاراستى شۇعىل شتاب باسشىسىنىڭ ورىنباسارى بەردييا سيچيناۆا بريفينگتە ايتتى, دەپ حابارلايدى "ۇلت اقپارات" گرۋزييا جاڭالىقتارىنا سٸلتەمە جاساپ.
ەلدە قاۋٸپتٸ ٸندەتكە شالدىققانداردىڭ جالپى سانى 201 368 بولدى.
سوڭعى 24 ساعاتتا 17 029 تەست جاسالعان. ونىڭ 8,9 مىڭى - ەكسپرەسس, قالعانى - پتر تەست.
جاڭادان اۋرۋ جۇقتىرعاندارىڭ 43 پايىزى نەمەسە 1282-سٸ - تبيليسي تۇرعىندارى.
ٶتكەن تەۋلٸكتە 31 سىرقات كوروناۆيرۋستان كٶز جۇمعان. جالپى, اۋرۋدان قايتىس بولعانداردىڭ سانى 1 953 ادامعا جەتتٸ.
2001 ادام كوروناۆيرۋستان جازىلدى, ال ەل بويىنشا ٸندەتتەن جازىلعاندار سانى 169 مىڭنان استى.
قازٸرگٸ تاڭدا ەلدە 30 مىڭنان استام ادام COVID-19 دەرتٸمەن اۋىرىپ جاتىر. ونىڭ ٸشٸندە 6 758 ادام - اۋرۋحانادا, 21 102 ناۋقاس - ٷيٸندە, قالعان 2 247 ادام - ارنايى جابدىقتالعان كوۆيد قوناق ٷيدە ەمدەلٸپ جاتىر.
ونىڭ ٸشٸندە 1 130 سىرقاتتىڭ جاعدايى ناشار. 430 ادام ٶكپەنٸ جاساندى جەلدەتۋ اپپاراتىنا قوسىلعان.
گرۋزييادا 471 ازامات كارانتيندە بولسا, 47 764 ادام ٶزٸن-ٶزٸ وقشاۋلاعان.
