13 قازاندا تاڭەرتەڭ گروزنىي قالاسىنىڭ وكتيابرسك اۋدانىندا اتىس بولىپ, جەتٸ ادام قازا تاپقان. اراسىندا كٷشتٸك قۇرىلىم ٶكٸلدەرٸ دە بار. بيلٸك "روسگۆاردييا" مەن پوليتسييانىڭ ارنايى وپەراتسييا ٶتكٸزگەنٸن حابارلادى. وپەراتسييا بارىسىندا قارسى تاراپتىڭ وعىنان تٶرت سارباز مەرت بولعان. تەرروريزممەن كٷرەس كوميتەتٸ پوليتسەيلەرگە وق اتقانداردى "قاراقشىلار" دەپ اتادى.
شەشەنستان باسشىسى رامزان قادىروۆ Telegram-داعى پاراقشاسىندا اتىس كەزٸندە "قۇقىق قورعاۋ ورگانىنىڭ ەكٸ قىزمەتكەرٸ" قازا تاپتى دەپ جازدى. ونىڭ جازۋىنشا, زاڭسىز قارۋلى توپ شەشەنستانعا شەتەلدەن كەلگەن.
سەيسەنبٸ كٷنٸ تاڭەرتەڭ تەراكت جايلى قوقان-لوقى سيپاتىنداعى حابارلامالارعا بايلانىستى گروزنىيدىڭ وكتيابرسك اۋدانىندا تەرروريزممەن كٷرەس وپەراتسيياسى رەجيمٸ ەنگٸزٸلگەن. وپەراتسييا بارىسىندا قارۋلى توپ ٶكٸلدەرٸ جەر ٷيلەرگە جاسىرىنعان. پوليتسييا ولاردان بەرٸلۋٸن تالاپ ەتكەن كەزدە وق جاۋدىرعان.
"كاۆكاز.رەاليي" سايتىنىڭ جازۋىنشا, پوليتسەيلەرگە وق اتقان ادامدار جاسىرىنعان ٷي كەيٸنٸرەك ٶرتەنگەن.
بۇل سوڭعى بٸرنەشە كٷن ٸشٸندە شەشەنستاندا بولعان ەكٸنشٸ ارنايى وپەراتسييا. 11 قازاندا سەرنوۆود اۋدانىندا زاڭسىز قارۋلى توپقا مٷشە دەلٸنگەن ەكٸ ادام اتىپ ٶلتٸرٸلگەن.
