ورتا سالماقتاعى بۇرىنعى ەلەم چەمپيونى گەنناديي گولوۆكين مەكسيكالىق باپكەرٸ ابەل سانچەسپەن جۇمىسىن توقتاتتى, دەپ حابارلايدى "ۇلت اقپارات".
«مەن ٶزٸم ٷشٸن, مانسابىم ٷشٸن ماڭىزدى شەشٸم قابىلداعانىمدى جەتكٸزگٸم كەلەدٸ. جەتٸستٸكتەرٸمە سٷيەنە وتىرىپ, ٶزٸمدٸ جەتٸلدٸرە تٷسكٸم كەلەدٸ. سوندىقتان ەندٸ ابەل سانچەسپەن جاتتىعۋ ٶتكٸزبەيمٸن. بۇل مەن ٷشٸن وڭاي شەشٸم بولعان جوق, ەرٸ مۇنىڭ ابەلدٸڭ كەسٸبي قابٸلەتٸنە دە ەش قاتىسى جوق. ول - تاماشا باپكەر, جۇمىسىنا ادال, داڭق زالىنا اتى جازىلعان باپكەر. جاڭا باپكەرٸم تۋرالى كەيٸنٸرەك حابارلايمىن. ال بٷگٸن بوكستا بەرگەن ساباقتارى ٷشٸن ابەلگە العىس ايتامىن», - دەپ جازدى قازاقستاندىق بوكسشى Instagram پاراقشاسىنا.
ەسكە سالا كەتەيٸك, ساراپشىلار بىلتىر گولوۆكين مەن مۋرات گاسسيەۆتٸڭ جەڭٸلٸسٸنەن كەيٸن ابەل سانچەستٸڭ بٸلٸكتٸلٸگٸن سىنعا الا باستاعان بولاتىن. گەنناديي گولوۆكين سانچەسپەن 2010 جىلدان بەرٸ جاتتىعىپ كەلدٸ.
GGG (38-1-1, 34كو) 8 ماۋسىمدا نيۋ-يوركتەگٸ (اقش) Madison Square Garden ارەناسىندا كانادالىق بوكسشى ستيۆ روللسپەن (19-0, 10 كو) كەزدەسەدٸ.
