گەرمانييادا ەكٸنشٸ دٷنيەجٷزٸلٸك سوعىستان قالعان بومبا تابىلىپ, 16 مىڭ ادام ەۆاكۋاتسييالاندى, دەپ xابارلايدى Frankfurter Rundschau باسىلىمى.
گەرمانييانىڭ ماينداعى فرانكفۋرت قالاسىندا ٸٸ دٷنيەجٷزٸلٸك سوعىستان قالعان بومبا تابىلىپ, 16 مىڭ تۇرعىن قاۋٸپسٸز جەرگە كٶشٸرٸلدٸ.
سالماعى 500 كگ سنارياد ەۋروپا ورتالىق بانكٸ عيماراتىنىڭ الدىنداعى قۇرىلىس جۇمىستارى كەزٸندە تابىلعان.
inFranken.de باسىلىمىنىڭ جازۋىنشا, سنارياد امەريكادا جاسالعان. بومبانى زالالسىزداندىرماس بۇرىن 1 كم راديۋستاعى كەڭسەلەر مەن تۇرعىن ٷيلەردەن ادامداردى تٷگەل ەۆاكۋاتسييالاۋعا شەشٸم قابىلدانعان. اتالعان شەڭبەردە بانك عيماراتى, تەمٸرجول ۆوكزالى, قالاداعى ەلەكتر پويىزداردىڭ ايالدامالارى, پوليتسييا ۋچاسكەسٸ, قارتتار ٷيٸ, زووپارك, تۇرعىن ٷيلەر - ۇزىن-ىرعاسى 1000-نان استام عيمارات بار.
بيلٸك ٶكٸلدەرٸ ٷيمە-ٷي كٸرٸپ تەكسەرٸپ جٷر. جالپى 16,5 مىڭنان استام ەۆاكۋاتسييالانادى.
مامانداردىڭ ايتۋىنشا, بومبانى زالالسىزداندىرۋعا 4 ساعاتتاي ۋاقىت كەتەدٸ.
