دٷيسەنبٸ, 7 ماۋسىمدا گااگا ايماقتىق سوتىندا 2014 جىلى ۋكراينادا قۇلاعان Malaysia Airlines ەۋە كومپانيياسىنىڭ MH17 ۇشاعى اپاتىنا بايلانىستى سوت تىڭداۋى باستالادى. وندا اپاتتىڭ جاي-جاپسارى قارالادى. لاينەر امستەردام – كۋالا-لۋمپۋر باعىتى بويىنشا ۇشقان. بورتتا 298 ادام بولعان. بارلىعى وپات بولدى.
اپاتقا بايلانىستى ايىپتالعاندارعا قاتىستى سوت پروتسەسٸ 2020 جىلى 9 ناۋرىزدا امستەردامدا باستالعان. ٸستە تٶرت ايىپتالۋشى بار, ٷشەۋٸ – رەسەي ازاماتى: فسب-نىڭ زاپاستاعى پولكوۆنيگٸ يگور گيركين (سترەلكوۆ), گرۋ-دىڭ وتستاۆكاداعى اعا وفيتسەرٸ سەرگەي دۋبينسكيي, ەۋە دەسانت ەسكەرٸنٸڭ زاپاستاعى پودپولكوۆنيگٸ ولەگ پۋلاتوۆ. تٶرتٸنشٸ ايىپتالۋشى – ٶزٸن رەسپۋبليكا رەتٸندە جارييالاعان دنر-دٸڭ بارلاۋ بٶلٸمٸنٸڭ كومانديرٸ لەونيد حارچەنكو.
2014 جىلى, ۋكراينا مەن رەسەي اراسىندا قاقتىعىس كٷشەيگەن تۇستا, Malaysia Airlines ەۋە كومپانيياسىنىڭ امستەردامنان كۋالا-لۋمپۋرگە ۇشىپ شىققان MH17 رەيسٸ ۋكراينانىڭ شىعىسىندا قۇلاعان. بۇل ۋاقىتتا ۋكراينانىڭ شىعىسى رەسەي قولدايتىن سەپاراتيستەردٸڭ باقىلاۋىندا ەدٸ. تەرگەۋشٸلەر ۇشاقتى رەسەيدٸڭ "بۋك" زىمىران جٷيەسٸمەن اتىپ تٷسٸرگەنٸن ايتادى.
بارلىق ايىپتالۋشى – يگور گيركين (سترەلكوۆ), سەرگەي دۋبينسكيي, ولەگ پۋلاتوۆ جەنە لەونيد حارچەنكو سوتقا كەلۋدەن باس تارتتى. بٸراق پۋلاتوۆ سوتپەن ادۆوكاتى ارقىلى بايلانىسۋعا كەلٸستٸ. ونىڭ مٷددەسٸن نيدەرلاندىلىق ەكٸ ادۆوكات پەن رەسەيلٸك بٸر زاڭگەر قورعايدى.
