فوتو: "قازاقستان بارىسى" رەسپۋبليكالىق تۋرنيرٸنٸڭ باسپاسٶز قىزمەتٸ
استانا قالاسىندا رەسپۋبليكا كٷنٸنە وراي, قازاق كٷرەسٸنەن ٶتكەن «قازاقستان بارىسى-2024» رەسپۋبليكالىق تۋرنيرٸندە ەراسىل قاجىباەۆ قارسىلاسىن ۇتىپ چەمپيون اتاندى.
ناقىتىراق ايتساق, استاناداعى «بارىس ارەنا» سپورت كەشەنٸندە قازاق كٷرەسٸنەن حٸٸٸ رەسپۋبليكالىق «قازاقستان بارىسى» تۋرنيرٸنٸڭ فينالىندا ەرسۇلتان مۇزاپپاروۆ (شىمكەنت قالاسى) پەن ەراسىل قاجىباەۆ (اباي وبلىسى) بەلدەستٸ.
نەتيجەسٸندە ەراسىل قاجىباەۆ قارسىلاسىن سوڭعى سەتتە تازا ۇتىپ, تۋرنير جەڭٸمپازى اتاندى.
ال قازاق كٷرەسٸنەن حٸٸٸ رەسپۋبليكالىق «قازاقستان بارىسى» تۋرنيرٸنٸڭ 3-ورىن ٷشٸن بەلدەسۋدە سايات شامشيەۆ (اباي وبلىسى) پەن ەدٸل ورازباەۆ (ەسكەر بارىسى) شەبەرلٸك بايقاستى. نەتيجەسٸندە اباي وبلىسىنىڭ بالۋانى سايات شامشيەۆ باسىم تٷسٸپ, «قازاقستان بارىسى – 2024» تۋرنيرٸنٸڭ 3-ورىن يەگەرٸ اتاندى.
وسىلايشا 42 بالۋان باق سىناپ جاتقان تۋريردٸڭ شەشۋشٸ سىنىنا دا كەلٸپ جەتتٸ.
بۇل تۋرنيردە وبلىستىق جارىستاردىڭ قورىتىندىسى بويىنشا ٸرٸكتەلگەن ەلٸمٸزدٸڭ ەڭ مىقتى بالۋاندارى باق سىناپ جاتىر. ولار ەلٸمٸزدٸڭ 17 وبلىسى مەن رەسپۋبليكالىق ماڭىزى بار 3 قالا استانا, الماتى جەنە شىمكەنت قالالارىنىڭ سپورتشىلارى.
اتالعان تۋرنيردٸڭ جەڭٸمپازىنا 15 000 000 تەڭگە بەرٸلسە, 2-ورىن العان سپورتشى 3 300 000 تەڭگەگە يەلٸك ەتەدٸ. ال 3-ورىنعا قول جەتكٸزگەن بالۋان 1 080 000 تەڭگە كٶلەمٸندە سىياقى الادى.
سونىمەن قاتار ەر بالۋان ەر بەلدەسۋدە جەڭٸسكە جەتكەنٸ ٷشٸن تاعى 100 000 تەڭگەدەن الىپ وتىرادى. جالپى «قازاقستان بارىسى-2024» رەسپۋبليكالىق تۋرنيردٸڭ جٷلدە قورى - 27 100 000 تەڭگە.
اتالعان تۋرنيردە جەڭٸسكە جەتكەن بالۋانداردىڭ باپكەرلەرٸ دە سىياقىسىز قالمايدى. 3 720 000 تەڭگە سپورتشىلاردىڭ جاتتىقتىرۋشىلارىنا بەرٸلەدٸ.
اتالعان ٸرٸ دودا «بارىس-ارەنا» ستاديونىندا ٶتٸپ جاتىر.
ايتا كەتەيٸك, وسىعان دەيٸن جارتىلاي فينالعا كٸمدەردٸڭ شىققانىن جازعان ەدٸك.
