كٶكتەرەك اۋىلىنىڭ تۇرعىنى قاقتىعىستىڭ سالدارىنان جەرمەن جەكسەن بولعان ٷي ورنىندا تۇر. مامىر ايى 2021 جىل.
ەۋرووداق قىرعىزستاننىڭ باتكەن وبلىسىندا قارۋلى قاقتىعىستان قازا بولعانداردىڭ وتباسىنا 170 مىڭ ەۋرو (17 ملن سوم نەمەسە شامامەن 260 مىڭ دوللار) كٶلەمٸندە گۋمانيتارلىق كٶمەك بەرەدٸ.
ەو-نىڭ قىرعىزستانداعى ٶكٸلدٸگٸ قارجىلاي كٶمەك باتكەن وبلىسىندا قاقتىعىستان قاتتى زارداپ شەككەن اۋداندا تۇراتىن كەمٸندە التى مىڭ تۇرعىنعا بەرٸلەتٸنٸن حابارلادى. كٶمەك قىرعىزستانداعى قىزىل اي ۇيىمى ارقىلى ٷلەستٸرٸلەدٸ, دەپ جازادى ازاتتىق.
"تۇرعىندارعا بۇدان بٶلەك, بٷلٸنگەن ٷيلەردٸ جٶندەۋ ٷشٸن ماتەريالدار, العاشقى كٶمەك زاتتارى, گيگيەنا, تۇرمىستىق زاتتار بەرٸلەدٸ" دەدٸ ەۋرووداقتىڭ قىرعىزستانداعى ٶكٸلدٸگٸ.
28-30 سەۋٸردە قىرعىز-تەجٸك شەكاراسىندا بولعان قارۋلى قاقتىعىستان 154 ادام زارداپ شەككەن, 36 ادام قازا بولعان. اراسىندا بالالار دا بار. تەجٸك بيلٸگٸ 19 ادامنىڭ مەرت بولعانىن, 87 ادامنىڭ جارالانعانىن حابارلادى.
قىرعىزستاننىڭ باتكەن وبلىسىندا 136 ٷي, بٸرقاتار مەكتەپتەر مەن شەكارا بەكەتتەرٸ قيراعان. شامامەن 58 مىڭ ادام ٷيلەرٸنەن قاشۋعا مەجبٷر بولعان. تەجٸكستان 14 ٷيدٸڭ تولىق قيراعانىن, ەكٸ ٷي مەن بٸر شارۋاشىلىق نىسانىنىڭ جارتىلاي بۇزىلعانىن حابارلادى. شامامەن 15 مىڭ ادام قاقتىعىس ايماعىنان ەۆاكۋاتسييالانعان. ەكٸ تاراپ بٸر-بٸرٸن كٸنەلاپ, اۋىر باپتار بويىنشا قىلمىستىق ٸس قوزعادى.
