استانادا ٶتٸپ جاتقان «Kazakhstan Global Investment Roundtable» فورۋمىنىڭ كۋلۋارىندا قر ەنەرگەتيكا مينيسترٸ قانات بوزىمباەۆ قازٸرگٸ تاڭدا ەلٸمٸزگە تٶرتٸنشٸ مۇناي ٶڭدەۋ زاۋىتى قاجەت ەمەستٸگٸن ايتتى, دەپ حابارلايدى "ۇلت اقپارات" Baq.kz پورتالىنا سٸلتەمە جاساپ.
«قازٸرگٸ تاڭدا ەلٸمٸزگە تٶرتٸنشٸ مۇناي ٶڭدەۋ زاۋىتىن سالۋ قاجەت ەمەس. ٷش مۇناي ٶڭدەۋ زاۋىتىن جاڭارتۋ جۇمىستارى بٸتەيٸن دەپ جاتىر. اتىراۋ مەن پاۆلودارداعى اتالعان زاۋىتتار بيىل جۇمىستى بٸتٸرۋلەرٸ كەرەك. «قازمۇنايگاز» كومپانيياسى كەلەسٸ جىلى «شىمكەنت» مۇناي ٶڭدەۋ زاۋىتىن كٷردەلٸ جٶندەۋدەن ٶتكٸزەدٸ. دەمەك الداعى 5-6 جىلدىڭ ٸشٸندە ەلٸمٸزدٸ 100 پايىز بەنزين, ديزەل وتىنى, اۆياكەروسينمەن قامتاماسىز ەتە الامىز», — دەدٸ مينيستر جۋرناليستەرگە.
سونىمەن قاتار, ۆەدومستۆو باسشىسى الداعى ۋاقىتتا جانار-جاعارمايعا سۇرانىس ارتسا, ەلٸمٸزدەگٸ مۇناي ٶڭدەۋ زاۋىتىنىڭ بٸرٸن كەڭەيتۋ قاجەتتٸگٸن دە ايتىپ قالدى.
«ال 2024-2025 جىلدارى بٸر زاۋىتتى (مۇناي ٶڭدەۋ زاۋىتى — اۆتور) ەكٸ ەسە ٷلكەيتۋ كەرەك. ٶيتكەنٸ, سۇرانىس ارتادى نەمەسە تٶرتٸنشٸ زاۋىتتى (مۇناي ٶڭدەۋ زاۋىتى — اۆتور) سالۋعا مەجبٷر بولامىز», — دەپ تٷيٸندەدٸ سٶزٸن قانات بوزىمباەۆ.
