قر ينۆەستيتسييا جەنە دامۋ مينيسترٸ جىل سوڭىنا دەيٸن ۇشاقپەن جول جٷرۋ باعاسى ايتارلىقتاي تٶمەندەيتٸنٸن مەلٸمدەدٸ, - دەپ حابارلايدى كتك تەلەارناسى. وسىعان بايلانىستى بيىل ەۋەدەگٸ اپاتتىڭ سالدارىن تەرگەپ, تەكسەرەتٸن جاڭا مەملەكەتتٸك ورگان قۇرىلادى.
جەڭٸس قاسىمبەكتٸڭ ايتۋىنشا, ەلٸمٸزدە كەروسين تاپشى ەكەن. سوندىقتان بيلەتتٸڭ باعاسى دا جوعارى.
"كەروسيننٸڭ 60 پايىزىن شەتەلدەن تاسىمالدايمىز. ال بيلەت قۇنىنىڭ 30 پايىزى جانارماي باعاسىنا بايلانىستى. ەلٸمٸزدەگٸ مۇناي ٶڭدەيتٸن زاۋىتتار قايتا ٸسكە قوسىلعان سوڭ تاپشىلىقتان قۇتىلامىز. وتاندىق ۇشاقتارعا جىلىنا 800 مىڭ توننا كەروسين كەرەك", - دەدٸ مينيستر.
ياعني, جىل سوڭىنا قاراي ەۋەكومپانييالارىنا بيلەتتٸ ارزانداتۋ تۋرالى تالاپ قويىلادى. ەگەر باعانى تٶمەندەتۋدەن باس تارتسا, باعىتتى باسقا تاسىمالداۋشىلارعا بەرەمٸز دەيدٸ مينيستر. سونداي-اق, سەناتورلار جيٸلەپ كەتكەن ۇشاق اپاتتارىنا قاتىستى تەكسەرۋدٸ سيىرقۇيىمشاقتاندىرىپ, ناقتى سەبەبٸن جارييالاۋدان قاشاتىن شەنەۋنٸكتەرگە دە شٷيلٸكتٸ. بۇل رەتتە مۇحتار التىنباەۆ ەۋەدەگٸ قاۋٸپسٸزدٸك پەن تٶتەنشە جاعدايلاردى زەرتتەيتٸن بٶلەك ورگان قۇرۋدى ۇسىندى.
سونداي-اق, مينيستر ازاماتتىق اۆياتسييا كوميتەتٸ ەۋە كەڭٸستٸگٸندە بولعان اپاتتى, تٶتەنشە جاعدايدى تەكسەرۋ جۇمىستارىنا ارالاسپايتىنىن ايتتى. "وعان كوميتەتتٸڭ ەش قاتىسى جوق. ال كٶلٸك پروكۋراتۋراسىنىڭ تالاپتارىنا قاتىستى دەلەل, ۋەجٸمٸز بار", - دەدٸ قاسىمبەك.
