ەلٸمٸزدە تۇرعىن ٷي قۇرىلىسى سالاسىنا باعىتتالعان ينۆەستيتسييا كٶلەمٸ ٶستٸ. بۇل تۋرالى قر يندۋسترييا جەنە ينفراقۇرىلىمدىق دامۋ بٸرٸنشٸ ۆيتسە-مينيسترٸ قايىربەك ٶسكەنباەۆ ايتتى, دەپ حابارلايدى قازاقپارات.
«قازاقستاندا سوڭعى 2 جىل ٸشٸندە تۇرعىن ٷي قۇرىلىسىنا قۇيىلاتىن ينۆەستيتسييا كٶلەمٸ كٷرت ٶستٸ. ستاتيستيكاعا جٷگٸنسەك, 2019 جىلدىڭ مامىر ايىندا ينۆەستيتسييا كٶلەمٸ 432 ملرد تەڭگە, ال بيىل مامىر اي بويىنشا 732 ملرد تەڭگەنٸ قۇراپ وتىر. بۇل دەگەنٸمٸز 2 جىل ٸشٸندە تۇرعىن ٷي قۇرىلىسى سالاسىنا ينۆەستيتسييا 1,7 ەسەگە ارتتى. بيىل اتالعان سالاعا ينۆەستيتسييانىڭ ارتۋىنا تاعى بٸر سەبەپ زەينەتاقى جيناعىن باسپانا الۋ ماقساتىندا قولدانۋعا رۇقساتتىڭ بەرٸلۋٸ. ماۋسىم ايىندا ەلٸمٸزدە تۇرعىن ٷي باعاسى تۇراقتانا باستادى, وعان سەبەپ زەينەتاقى جيعانىنىڭ جاپپاي قولدانىلىپ بولۋى», - دەدٸ ق. ٶسكەنباەۆ وكق-دە ٶتكەن باسپاسٶز مەسليحاتىندا.
ونىڭ ايتۋىنشا, تۇرعىن ٷيگە سۇرانىستىڭ ارتۋى قۇرىلىس ماتەريالدارىنىڭ تاپشىلىعى مەن ونىڭ باعاسىنىڭ ٶسۋٸنە الىپ كەلدٸ.
«وتاندىق قۇرىلىس ماتەريالدارىن ٶندٸرۋشٸلەر كەڭ كٶلەمدٸ سۇرانىسقا تٶتەپ بەرە المادى. سالدارى باعانىڭ ٶسۋٸنە الىپ كەلدٸ. قازٸرگٸ وتاندىق ٶندٸرۋشٸلەر ٸشكٸ نارىقتى بەتون, تسەمەنت, قابىرعا ماتەريالدارىمەن تولىقتاي قامتاماسىز ەتٸپ وتىر. مىسالى, ەلٸمٸزدە ارماتۋر ٶندٸرەتٸن 9 ٶنەركەسٸپ جۇمىس ٸستەيدٸ, ونىڭ قۋاتى جىلىنا 1,9 توننانى قۇراسا, ٸشكٸ نارىقتاعى ارماتۋرعا سۇرانىس 1,2 ملن توننانى قاجەت ەتەدٸ», - دەيدٸ ول.
