قازاقستاندا قاعاز ٶنٸمدەرٸنٸڭ شىعارىلىمى قارقىندى تٷردە ارتىپ كەلەدٸ, دەپ حابارلايدى "ۇلت اقپارات" energyprom.kz سايتىنا سٸلتەمە جاساپ.
قاعاز بەن قاعاز ٶنٸمدەرٸنٸڭ كٶلەمٸ 2019 جىلدىڭ قاڭتار-قىركٷيەك ايلارىندا 47,6 ملرد تەڭگەگە جەتٸپ, بىلتىرعى جىلدىڭ ۇقساس كەزەڭٸمەن سالىستىرعاندا 103,3 پايىزدىق كٶرسەتكٸشتٸ كٶرسەتٸپ وتىر.
«جالپى, 2017 جىلى قاعاز بەن قاعاز ٶنٸمدەرٸنٸڭ ٶندٸرٸس كٶلەمٸ 53,5 ملرد تەڭگەنٸ كٶرسەتسە, بىلتىر 58,3 ملرد تەڭگەگە جەتكەن. قازاقستان بويىنشا اتالمىش ٶنٸمنٸڭ 27,8 پايىزدىق بٶلٸگٸ الماتى وبلىسىنا (27,8 پايىز) تيەسٸلٸ. قاعاز ٶنٸمدەرٸنٸڭ نەگٸزگٸ ٶندٸرۋشٸلەرٸ – «قازاقستان قاعازى» اق پەن «قاعاز رەسايكلينگ» جشس. ەكٸنشٸ ورىندا الماتى قالاسى تۇر. 9 ايدىڭ ٸشٸندەگٸ جالپى ٶنٸمنٸڭ 12,7 ملرد تەڭگەسٸ وڭتٷستٸك استانادا ٶندٸرٸلگەن. مەگاپوليستە «كارينا ترەيدينگ» جشس, «كومپانييا ۆ» جشس مەن «Almapack Co LTD» جشس سەكٸلدٸ كومپانييالار جۇمىس ٸستەپ تۇر. جىلدىڭ ٷزدٸك ٶسٸمٸ شىمكەنت قالاسىندا تٸركەلدٸ («اقجول-2008 لتد» جشس مەن «بۋمپروم» جشس)», - دەلٸنگەن حابارلامادا.
قاعاز بەن قاعاز ٶنٸمدەرٸنٸڭ ٸشٸنەن كٶبٸنەسە قوراپتار, جەشٸكتەر مەن سٶمكەلەر شىعارىلادى. 9 ايدىڭ ٸشٸندە اتالعان ٶنٸمدەردەن 68,3 مىڭ توننا شىعارىلعان. قاعاز بەن كارتون شىعارىلىمى ٶتكەن جىلدىڭ ۇقساس كەزەڭٸمەن سالىستىرعاندا 188,7 پايىزدىق ٶسٸمدٸ كٶرسەتكەن.
