قازاقستاندا حالىقتىڭ نەسيەلٸك مەدەنيەتٸ تٶمەن دەڭگەيدە قالىپ وتىر. بۇل تۋرالى بٷگٸن قر پارلامەنتٸ مەجٸلٸسٸنٸڭ «كوللەكتورلىق قىزمەت تۋرالى» زاڭ جوباسى بويىنشا جۇمىس توبىنىڭ وتىرىسىنان كەيٸن تٸلشٸلەرگە بەرگەن سۇحباتىندا قر ۇلتتىق بانكٸ تٶراعاسىنىڭ ورىنباسارى ولەگ سمولياكوۆ مەلٸم ەتتٸ. بۇل تۋرالى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ حابارلايدى.
«بٸزدە شامامەن 5 ميلليون جەكە تۇلعادا بانك نەسيەلەرٸ بار. ولاردىڭ 1 ميلليونىندا بەرەشەك 90 كٷننەن اسىپ كەتكەن. بانكتەردٸڭ سسۋدالىق پورتفەلٸنٸڭ 20 پايىزى جەكە تۇلعالارعا تيەسٸلٸ. بۇل نەگٸزٸنەن يپوتەكا مەن تۇتىنۋشىلىق نەسيەلەر», - دەيدٸ و.سمولياكوۆ.
ونىڭ سٶزٸنە قاراعاندا, جەكە تۇلعالارعا بەرٸلگەن نەسيەلەردٸڭ 85 پايىزى ەشقانداي كەپٸلدٸكپەن قامتاماسىز ەتٸلمەگەن. كەپٸلدٸكتٸڭ بولماۋى قارىزدى تالاپ ەتۋدٸڭ قيىندىعىنا بايلانىستى. ونىڭ ٷستٸنە, بانكتەردەن نەسيە الۋعا كەلگەن قارىز الۋشىلاردىڭ 64 پايىزى ٶزٸنٸڭ تۇرعىلىقتى جەرٸ مەن قارجىلىق قابٸلەتتەرٸ تۋرالى اقپاراتتى جاسىرادى. و.سمولياكوۆتٸڭ پٸكٸرٸنشە, بۇل حالىقتىڭ نەسيەلٸك مەدەنيەتٸ تٶمەن دەڭگەيدە قالىپ وتىرعاندىعىن بٸلدٸرەدٸ.
ايتا كەتەيٸك, قازٸر پارلامەنت مەجٸلٸسٸندە ۇلتتىق بانك ٶكٸلدەرٸنٸڭ قاتىسۋىمەن «كوللەكتورلىق قىزمەت» تۋرالى زاڭ جوباسى تالقىلانۋدا.
