مەملەكەت باسشىسى رەسپۋبليكا كٷنٸنە وراي جوعارى ەسكەري جەنە ارناۋلى اتاقتار, سىنىپتىق شەندەر تاپسىردى, دەپ حابارلايدى "ۇلت اقپارات" اقوردانىڭ رەسمي سايتىنا سٸلتەمە جاساپ.
قاسىم-جومارت توقاەۆ ٸس-شاراعا قاتىسۋشىلاردى ەلٸمٸزدٸڭ ەڭ ۇلىق مەرەكەسٸ – رەسپۋبليكا كٷنٸمەن قۇتتىقتاپ, 1990 جىلى 25 قازاندا مەملەكەتتٸك ەگەمەندٸگٸمٸز تۋرالى دەكلاراتسييا قابىلدانعانىن ەسكە سالدى. ونىڭ ايتۋىنشا, بۇل – قازاقستاننىڭ تەۋەلسٸزدٸك الۋىنا جول اشقان تاريحي قۇجات.
پرەزيدەنت ەل شەجٸرەسٸندەگٸ اسا ماڭىزدى وسى كٷنگە ۇلتتىق مەرەكە مەرتەبەسٸ بەرٸلگەنٸن ايتىپ, بيىلدان باستاپ بۇل مەيرامدى جوعارى دەڭگەيدە اتاپ ٶتەتٸنٸمٸزدٸ جەتكٸزدٸ.
– ەسكەري جەنە ارناۋلى اتاقتار, سىنىپتىق شەندەر رەسپۋبليكا كٷنٸنە وراي العاش رەت تاپسىرىلماق. بۇل ٶتە ورىندى دەپ سانايمىن. بٸز – اق بٸلەكتٸڭ كٷشٸمەن, اق نايزانىڭ ۇشىمەن ەل قورعاعان باتىرلار ەلٸمٸز. ەرلەرٸمٸز جەر شەتٸنە جاۋ تيمەسٸن دەپ ەرقاشان بەس قارۋىن ساي ۇستاعان. ەل باسىنا كٷن تۋسا, تۋ تٷبٸنەن تابىلعان. سٸزدەر سول بابالار جولىن لايىقتى جالعاستىرىپ كەلەسٸزدەر. ەگەمەندٸكتٸڭ بٷكٸل قادٸر-قاسيەتٸ – جەردٸڭ تۇتاستىعىندا جەنە ەلدٸڭ تىنىشتىعىندا. وسى اسىل قۇندىلىقتاردى ٶزدەرٸڭٸز قاس قاقپاي كٷزەتٸپ تۇرسىزدار. ايبىندى ارمييامىز جەنە باسقا دا قاۋٸپسٸزدٸك قۇرىلىمدارى – مەملەكەتٸمٸزدٸڭ بەرٸك قالقانى, – دەدٸ قاسىم-جومارت توقاەۆ.
مەملەكەت باسشىسى قازٸرگٸ زاماننىڭ قانشالىقتى كٷردەلٸ ەكەنٸنە توقتالىپ, ەل قاۋٸپسٸزدٸگٸن ساقتاۋ اسا ماڭىزدى مٸندەت ەكەنٸنە نازار اۋداردى.
– بٸز ارقانى كەڭگە سالماي, بارلىق سالادا تەمٸردەي تەرتٸپتٸ ساقتاۋىمىز كەرەك. ەلگە قاتەر تٶنسە, كەز-كەلگەن سەتتە تويتارىس بەرۋگە دايىن بولۋىمىز قاجەت. تۋعان جەردٸڭ شەبٸن كٷزەتٸپ, تۇتاستىقتى ساقتاۋ – ەر ازاماتتىڭ مٸندەتٸ. مۇنى جەتە تٷسٸنۋگە تيٸسپٸز. ەلٸمٸزدٸڭ قاۋٸپسٸزدٸگٸن قامتاماسىز ەتۋ – قاسيەتتٸ بورىش, جوعارى جاۋاپكەرشٸلٸك. سٸزدەر وسى جاۋاپكەرشٸلٸكتٸ تەرەڭ سەزٸنٸپ, ەلدٸگٸمٸزدٸڭ تۇعىرىن نىعايتۋعا زور ٷلەس قوسىپ جٷرسٸزدەر. وتانىمىزدى قورعاۋ ٷشٸن كٷندٸز-تٷنٸ قىزمەت ەتٸپ كەلەسٸزدەر. جاس ساربازدار, ەڭ الدىمەن, سٸزدەرگە قاراپ بوي تٷزەيدٸ, ٷلگٸ-ٶنەگە تۇتادى. سوندىقتان, گەنەرال دەگەن ايبىندى اتقا داق تٷسٸرمەي, وفيتسەردٸڭ ار-نامىسىن بيٸك ۇستاۋ اسا ماڭىزدى, – دەدٸ پرەزيدەنت.
قازاقستاننىڭ قارۋلى كٷشتەرٸنٸڭ جوعارعى باس قولباسشىسى ەسكەريلەر مەن ارناۋلى جەنە قۇقىق قورعاۋ ورگاندارىنىڭ قىزمەتكەرلەرٸن ماراپاتتاۋ ولاردىڭ وتان قورعاۋ جولىنداعى مٸنسٸز قىزمەتٸنە بەرٸلگەن جوعارى باعا دەپ اتاپ ٶتتٸ.
– بٸز ازاماتتارىمىزدىڭ بەيبٸت ٶمٸرٸ مەن تىنىشتىعىن قورعاپ جٷرگەن ەربٸرٸڭٸزدٸ قۇرمەت تۇتامىز. ٶرشٸپ كەلە جاتقان گەوستراتەگييالىق شيەلەنٸس جاعدايىندا كٷشتٸك قۇرىلىمداردىڭ ماڭىزى بٸرنەشە ەسە ارتادى. ارمييا, قۇقىق قورعاۋ جەنە ارناۋلى ورگاندار – ەلٸمٸزدٸڭ ەگەمەندٸگٸ مەن اۋماقتىق تۇتاستىعىنىڭ سەنٸمدٸ تٸرەگٸ, قوعامدىق تەرتٸپ پەن ازاماتتاردىڭ قاۋٸپسٸزدٸگٸنٸڭ كەپٸلٸ, – دەدٸ مەملەكەت باسشىسى.
قاسىم-جومارت توقاەۆ مەملەكەت قارۋلى كٷشتەردٸڭ جاۋىنگەرلٸك ەزٸرلٸگٸن ارتتىرۋعا, ولاردى زاماناۋي قارۋ-جاراقپەن جەنە تەحنيكامەن جاراقتاندىرۋعا ەرەكشە كٶڭٸل بٶلٸپ وتىرعانىن جەتكٸزدٸ. سونداي-اق قاسيەتتٸ تەۋەلسٸزدٸگٸمٸزدٸ, ەلدەگٸ بەيبٸتشٸلٸك پەن كەلٸسٸمدٸ ساقتاۋ ٷشٸن قورعانىس ەلەۋەتٸمٸزدٸ دەيەكتٸ تٷردە نىعايتىپ, بٷكٸل كٷشتٸك قۇرىلىمداردىڭ قىزمەتٸن جەتٸلدٸرە بەرەتٸنٸن ايتتى.
– ۇلتتىق مٷددەمٸز بەن قوعامداعى تۇراقتىلىقتى قورعايتىن بارلىق ازاماتتى ەلەۋمەتتٸك تۇرعىدا كەشەندٸ قولداۋ قاشان دا مەملەكەتتٸك ساياساتتىڭ باسىم باعىتى بولىپ قالا بەرەدٸ. كٷشتٸك قۇرىلىمداردىڭ تيٸمدٸلٸگٸ, ەڭ الدىمەن, باسشىلىقتىڭ, ياعني, گەنەرالداردىڭ كەسٸبيلٸگٸنە نەگٸزدەلگەن. ادامداردىڭ ٶمٸرٸ مەن تاعدىرى, قوعامدىق تەرتٸپ, ەلدٸڭ يگٸلٸگٸ مەن تۇراقتى دامۋى سٸزدەردٸڭ كەسٸبي شەبەرلٸكتەرٸڭٸزگە بايلانىستى, – دەدٸ پرەزيدەنت.
سالتاناتتى رەسٸمنەن كەيٸن مەملەكەت باسشىسى جاڭا اتاق-شەن العانداردىڭ بارشاسىن قۇتتىقتاپ, ەر-ازامات ٷشٸن حالقىنا قالتقىسىز قىزمەت ەتۋدەن اسقان باقىت جوق ەكەنٸن اتاپ ٶتتٸ.
– قاستەرلٸ وتانىمىزدى, قاسيەتتٸ تەۋەلسٸزدٸگٸمٸزدٸ قورعاۋ – ەر ازاماتتىڭ پەرزەنتتٸك پارىزى. بارشاڭىزعا زور دەنساۋلىق, وتباسىلارىڭىزعا باق-بەرەكە تٸلەيمٸن! رەسپۋبليكا كٷنٸ قۇتتى بولسىن! كٶك بايراعىمىز ەرقاشان بيٸكتە جەلبٸرەسٸن! – دەدٸ قاسىم-جومارت توقاەۆ.
