ۆيدەو كادرلارى
نەمٸس پوليتسيياسى ەكوبەلسەندٸ گرەتا تۋنبەرگتٸ ۋاقىتشا قاماۋعا الدى. ول پوليتسييا بٶلٸمشەسٸندە بٸرنەشە ساعات بولعان, - دەپ حابارلايدى Tengrinews.kz سايتى.
گرەتا تۋنبەرگ 17 قاڭتاردا گەرمانييانىڭ قاراۋسىز قالعان ليۋتتسەرات اۋىلى ماڭىنداعى كٶمٸر شاحتاسىنىڭ كەڭەيۋٸنە قارسى نارازىلىق اكتسيياسى كەزٸندە ۇستالعان.
تۋنبەرگ پەن باسقا دەمونسترانتتار جەكە باسىن انىقتاۋ ٷشٸن پوليتسييا بٶلٸمشەسٸنە جەتكٸزٸلگەن. احەن پوليتسيياسىنىڭ ٶكٸلٸ دانا تسيممەرماننىڭ ايتۋىنشا, ونداعان ادام ۇستالعان, الايدا ولار رەسمي تٷردە قاماۋعا الىنعان جوق.
ايتا كەتەيٸك, ليۋتتسەراتتاعى جاعداي قاڭتار باسىندا شيەلەنٸسە تٷستٸ. گەرمانيياداعى ەڭ ٸرٸ قوڭىر كٶمٸر كەنٸشتەرٸنٸڭ بٸرٸ گارتسۆايلەردٸ كەڭەيتۋ ٷشٸن كٶشٸرٸلگەن اۋىلدى بۇزۋ جوسپارلانعان بولاتىن. اۋىل تۇرعىندارى RWE كونتسەرنٸنەن ٶتەماقى الىپ, بۇل ەلدٸمەكەندٸ ەلدەقاشان تاستاپ كەتكەن. وسىدان كەيٸن ول جەرگە ەكوبەلسەندٸلەر ٶز ەركٸمەن قونىستانعان.
11 قاڭتاردا پوليتسييا بەلسەندٸلەردٸ ليۋتتسەراتتان قۋىپ, عيماراتتاردى بۇزۋ وپەراتسيياسىن باستادى. الايدا بەلسەندٸلەر قارسىلىق كٶرسەتتٸ. گەرمانييانىڭ تٷكپٸر-تٷكپٸرٸنەن مىڭداعان ادام اۋىلداعى نارازىلىق اكتسيياسىنا جينالدى. تابيعاتتى قورعاۋشى بەلسەندٸلەر كٶمٸر كەنٸشٸنٸڭ كەڭەيۋٸ قورشاعان ورتاعا زييانىن تيگٸزٸپ قانا قويماي, كليمات جٶنٸندەگٸ پاريج كەلٸسٸمٸنە قايشى كەلەتٸنٸنە سەنٸمدٸ.
