قازاقستاننىڭ دجەنتلمەندەر كلۋبى بەلگٸلٸ كەسٸپكەر ورالبەك بوتبايدىڭ قولداۋىمەن ارىس تۇرعىندارىنا 10 ملن تەڭگە اۋداردى, دەپ حابارلايدى "ۇلت اقپارات".
«قازاقستاننىڭ دجەنتلمەندەر كلۋبى بەلگٸلٸ كەسٸپكەر, ٶز ەلٸنٸڭ ناعىز پاتريوتى, ٷلگٸلٸ دجەنتەلمەن ورالبەك بوتبايدىڭ قولداۋىمەن ارىستاعى وتباسىلاردىڭ قاجەتتٸلٸگٸ ٷشٸن 10 ملن تەڭگە اۋدارادى. قازاقتار ەشقاشان بٸرٸن-بٸرٸ قيىن كەزەڭدە تاستاپ كەتكەن ەمەس. بٸزدٸڭ وسىناۋ كٶپ عاسىرلىق ٸزگٸ دەستٷرٸمٸز ححٸ عاسىردا دا جالعاسىن تاپتى», - دەپ جازدى كلۋب كٶشباسشىسى ارمان قاشقىنبەكوۆ facebook پاراقشاسىندا.
ەسكە سالا كەتسەك, قازاقستاننىڭ دجەنتلمەندەر كلۋبى بۇعان دەيٸن دە مۇقتاج وتباسىلارعا كٶمەك كٶرسەتٸپ كەلەدٸ. بۇعان دەيٸن كلۋب مٷشەلەرٸ ٶسكەمەندٸك 7 بالالى وتباسىعا ٷي الاتىن اقشا بەرگەن بولاتىن.
«وسىناۋ باستاما كٶپتٸڭ نازارىنا ٸلٸگە باستادى. باستاماعا بٸزدٸڭ بيزنەسمەن دوسىمىز ورالبەك بوتپاي دا قولداۋ كٶرسەتەتٸنٸن جەتكٸزدٸ. وسىلايشا, بيزنەسمەننٸڭ قولداۋىمەن بٷگٸن «قازاقستان بارىسى-2019» تۋرنيرٸنٸڭ قورىتىندىسىندا كٶپبالالى وتباسىعا بٸر ٷيدٸڭ قاراجاتى تابىستالدى. ياعني, ٶسكەمەندٸك وتباسىعا جاسالعان قولداۋ - دجەنتەلمەندەر كلۋبىنىڭ باسپانا سىيلاۋ بويىنشا ەكٸنشٸ جوباسى. ٶسكەمەندەگٸ 7 بالالى وتباسىنىڭ وتاعاسى عانا جۇمىس ٸستەيدٸ. اياداي بٶلمەنٸ جالداپ تۇرىپ جاتقان وتباسىعا وسىلايشا ٷي الىپ بەرۋدٸ شەشتٸك», - دەگەن ەدٸ كلۋب كٶشباسشىسى.
