پارلامەنت مەجٸلٸسٸنٸڭ دەپۋتاتى جانات وماربەكوۆا مۇعالٸم ماماندىعىنىڭ بەدەلٸن ارتتىرۋ بويىنشا بٸرٸككەن وتىرىستا مۇعالٸمدەرگە پايىزسىز نەسيە بەرۋدٸ ۇسىندى. بۇل تۋرالى sputniknews.kz حابارلادى.
مەجٸلٸس دەپۋتاتى بۇل ۇسىنىستى حالىقارالىق تەجٸريبەگە سٷيەنٸپ ايتىپ وتىر.
"حالىقارالىق تەجٸريبەنٸ الىپ قاراساق, مۇعالٸمدەرگە پايىزسىز نەسيە بەرۋ – ولاردى سول ماماندىقتا ۇستاپ تۇرۋ ٷشٸن تاپتىرماس شارا", — دەدٸ وماربەكوۆا.
ونىڭ ايتۋىنشا, بۇل امال ەلدەگٸ مۇعالٸم كادرلارىنىڭ تۇراقتاۋىنا ىقپال ەتەدٸ.
ايتا كەتەيٸك, كادرلاردىڭ تۇراقتاماۋى تۋرالى تاعى بٸر حالىق قالاۋلىسى ناتاليا جۇمادٸلداەۆا دا سٶز قوزعاعان ەدٸ.
ونىڭ پٸكٸرٸنشە, كادرلاردىڭ تۇراقتاماۋىن ۇلتتىق دەڭگەيدە ەسەپكە الۋ كەرەك.
"قازٸرگٸ ۋاقىتتا مۇنداي ەسەپ جٷرگٸزٸلٸپ جاتقان جوق. دەرەكتەردٸڭ جوقتىعىنان بۇل احۋال تۋرالى, پروبلەمالار مەن ماماندىقتى تاستاۋ سەبەپتەرٸ جايىندا بٸلە المايمىز. بۇل ۇستازدىڭ بەدەلٸن كٶتەرۋ ٷشٸن تيٸستٸ شارالار قابىلداۋعا كەدەرگٸ كەلتٸرەدٸ", — دەيدٸ جۇمادٸلداەۆا.
دەپۋتاتتىڭ مەلٸمەتٸنە سٷيەنسەك, كادرلاردىڭ تۇراقتاماۋىنا ۇستازداردىڭ جالاقىسى مەن ەڭبەك ەتۋ جاعدايىنا كٶڭٸلٸ تولماۋى سەبەپ بولادى.
"ايتا كەتسەك, بٸلٸم بەرۋ جٷيەسٸندەگٸ كادرلاردىڭ تۇراقتاماۋىنا حالىقارالىق فورمۋلامەن باعا بەرەتٸن بولساق, بٸزدٸڭ ەلدە كەم دەگەندە مۇعالٸمدەردٸڭ 1%-ى باسقا سالاعا اۋىسار بولسا, جارتى ميلليارد تەڭگە شىعىنعا ۇشىراتادى", — دەپ الاڭدايدى مەجٸلٸس دەپۋتاتى.
مۇعالٸمدەردٸڭ بەدەلٸن ارتتىرۋ قاجەتتٸگٸ تۋرالى قازاقستان پرەزيدەنتٸ نۇرسۇلتان نازارباەۆ 10 قاڭتارداعى جولداۋىندا ايتقان بولاتىن.
