«دامۋ» قورى اۋىل شارۋاشىلىعى ٶنٸمٸن ٶندٸرۋشٸلەردٸڭ نەسيەسٸنە كەپٸلدٸك بەرەدٸ. بۇل تۋرالى ٷكٸمەت وتىرىسىندا «اتامەكەن» ۇلتتىق كەسٸپكەرلەر پالاتاسىنىڭ باسقارما تٶراعاسى ابىلاي مىرزاحمەتوۆ ايتتى, دەپ حابارلايدى "ۇلت اقپارات".
«قاراپايىم زاتتار ەكونوميكاسى» باعدارلاماسى اياسىندا 400 ملرد تەڭگە ٶڭدەۋ, ياعني شيكٸزاتتىق ەمەس سالاعا باعىتتالعان. وعان كٶرسەتكٸشٸ جاقسى, سوماسى 326 ملرد تەڭگەدەن اساتىن جوبالار قابىلدانعان. اتالعان 400 ملرد تەڭگە سومانىڭ 81,6 پايىزىن قۇرايدى. نەگٸزگٸ سالالاردىڭ بارلىعى قامتىلعان. اۋىل شارۋاشىلىعى سالاسىن ايتار بولساق, وعان 300 ملرد تەڭگە بٶلٸنگەن. 139,9 ملرد تەڭگەنٸڭ جوبالارى قامتىلعان. 270 ملرد تەڭگە اۋىل شارۋاشىلىعى شيكٸزاتىن ٶندٸرۋگە بەرٸلگەن. كٶرسەتكٸش - 46,2 پايىز», - دەدٸ ابىلاي مىرزاحمەتوۆ.
ونىڭ ايتۋىنشا, بۇل سالاعا نەسيەنٸڭ 93 پايىزى «قازاگرو» تاراپىنان بەرٸلەدٸ.
ال ەكٸنشٸ دەڭگەيلٸ بانكتەر كەپٸلدٸكتٸڭ جەتپەۋٸنە بايلانىستى نەسيە بەرۋدە بەلسەندٸلٸك تانىتپاي وتىر.
«جالپى, باعدارلاماعا 7 مەرتە جٷيەلٸ ٶزگەرتۋلەر ەنگٸزٸلٸپ, ونىڭ وڭ دامۋىنا بارلىق جاعداي جاسالدى. جوعارىدا كەپٸلدٸك بەرۋ پروبلەما بولعانىن ايتقان ەدٸك. سٸزدٸڭ تاپسىرماڭىزبەن ەندٸ «دامۋ» قورى كەپٸلدٸك بەرەتٸن بولىپ وتىر. ياعني, كەلٸسٸم بويىنشا 1 ملرد تەڭگەگە دەيٸنگٸ نەسيەگە «دامۋ» قورى كەپٸلدٸك بەرەدٸ. ال 1 ملرد تەڭگەدەن جوعارى جوبالارعا سومانىڭ 50 پايىزىنا دەيٸنگٸ كەپٸلدٸكتٸ دە «دامۋ» قورى ۇسىنادى. مۇنداي جايت ەكٸنشٸ دەڭگەيلٸ بانكتەردٸڭ اۋىل شارۋاشىلىعى سالاسىنا نەسيە بەرۋٸن جانداندىرادى دەپ ويلايمىن», - دەدٸ ول.
