رەسەيدٸڭ اتىنان ٶنەر كٶرسەتەتٸن قازاق سپورتشىسى دامير يسماگۋلوۆتىڭ UFC ۇيىمىنداعى كەلەسٸ قارسىلاسى انىقتالدى, دەپ جازادى Vesti.kz تٸلشٸسٸ.
يسماگۋلوۆ كەلەسٸ كەزدەسۋٸن اقپان ايىنىڭ ورتاسىندا ٶتكٸزەدٸ. ونىڭ قارسىلاسى اۋعانستاندىق ناسرات حاكپاراست (13-4) بولادى. قولدا بار اقپارات بويىنشا, ايقاس 19 اقپان كٷنٸ لاس-ۆەگاس (نەۆادا شتاتى, اقش) قالاسىندا ٶتپەك.
ەۋ باستا حاكپاراست كانادالىق دجون ماكدەسسيمەن (18-7) كەزدەسۋٸ كەرەك ەدٸ. الايدا, ٶتكەن اپتادا 36 جاستاعى فايتەر وپەراتسييا جاساتىپ, سول ٷشٸن جەكپە-جەككە شىعا المايتىن بولدى.
ەندٸ ماكدەسسيدٸڭ ورنىن يسماگۋلوۆ باسادى. 30 جاستاعى قازاق سپورتشىسى UFC ۇيىمىندا تٶرت كەزدەسۋ ٶتكٸزٸپ, تٶرتەۋٸندە دە جەڭٸسكە جەتكەن. قازان ايىنىڭ سوڭىندا دامير بەسٸنشٸ كەزدەسۋٸن ٶتكٸزۋٸ كەرەك بولاتىن. بٸراق سالماق قۋۋ كەزٸندە دەنساۋلىعى سىر بەرٸپ, جەكپە-جەكتەن باس تارتتى.
ايتا كەتەيٸك, 2021 جىلى 26 جاستاعى حاكپاراستتىڭ دەنساۋلىعى ناشارلاپ, ونىڭ قاڭتار ايىنداعى ارمان تسارۋكيانمەن كەزدەسۋٸ ٶتپەي قالدى. ال سوڭعى كەزدەسۋٸن اۋعانستاندىق جاڭا زەلاندييا ەلٸنٸڭ ٶكٸلٸ دەن حۋكەرگە (21-11) قارسى ٶتكٸزٸپ, جەڭٸلٸپ قالدى.
2022 جىلدىڭ اقپان ايىندا UFC ەكٸ ٸرٸ تۋرنير ٶتكٸزبەكشٸ. ونىڭ ەكەۋٸندە دە قازاق سپورتشىلارى قاتىسادى. تارقاتىپ ايتساق, 5 اقپان كٷنٸ لاس-ۆەگاس قالاسىندا شاۆكات راحمونوۆ (14-0) كەزدەسۋٸن ٶتكٸزسە, 12 اقپان كٷنٸ حيۋستوندا (تەحاس شتاتى, اقش) UFC 271 تۋرنيرٸندە سەرگەي موروزوۆ (17-5) ٶنەر كٶرسەتەدٸ.
