زەينەتاقى جيناعى ەسەبٸنەن تۇرعىن ٷي ساتىپ الۋ بويىنشا ەڭ ٸرٸ مەمٸلە 162 ميلليون تەڭگەدەن استى. بۇل تۋرالى "وتباسى بانك" اق باسقارما تٶراعاسى لەززات يبراگيموۆا ايتتى, دەپ حابارلايدى Sputnik قازاقستان.
"يە, زەينەتاقى جيناعىنا تۇرعىن ٷي ساتىپ الۋعا قاتىستى ەڭ ٸرٸ مەمٸلەنٸڭ سوماسى 162,4 ميلليون تەڭگە بولدى. بۇل پرەميۋم-كلاسقا جاتاتىن باسپانا بولۋى كەرەك. ال ەڭ از مەمٸلەنٸڭ سوماسى ميلليون تەڭگەنٸڭ شاماسىندا بولدى. ونى اۋىلدى جەردە نەمەسە اۋدان ورتالىعىندا پايدالانعان سەكٸلدٸ", - دەدٸ يبراگيموۆا ورتالىق كوممۋنيكاتسييالار قىزمەتٸندە ٶتكەن ونلاين بريفينگتە.
ونىڭ ايتۋىنشا, بيىل زەينەتاقى جيناعىنىڭ بٸر بٶلٸگٸن پايدالانۋعا رۇقسات بەرٸلگەننەن كەيٸن باسپانا ساتىپ الۋ كٶرسەتكٸشٸ كٷرت ٶستٸ. سونىڭ سالدارىنان تۇرعىن ٷي باعاسى دا كٶتەرٸلدٸ.
"2021 جىلى ساتۋ-ساتىپ الۋ كەلٸسٸمشارتتارىنىڭ سانى ٶتكەن جىلمەن سالىستىرعاندا ەلدەقايدا كٶپ بولدى. وسى كٷنگە دەيٸن يپوتەكاسىز 179 192 مەمٸلە جاسالدى. ادامدار كرەديت الماي, ٷيدٸ تولىعىمەن ساتىپ الدى", - دەپ اتاپ ٶتتٸ يبراگيموۆا.
بانك باسشىسى زەينەتاقى جيناعى ەسەبٸنەن 17 ميلليون تەڭگەگە تٸسٸن ەمدەتكەن سالىمشى تۋرالى دا ايتتى.
"وندايدا كلينيكامەن جاسالعان كەلٸسٸمشارت پەن تٶلەنەتٸن شوتتى ۇسىنۋ قاجەت. يمپلانتاتسييا قىمبات بولادى. شۆەيتسارييالىق نەمەسە يزرايلدٸك يمپلانت بار. سوسىن 18-19 يمپلانت قويسا, 17 ميلليون تەڭگەنٸڭ ەسەپشوتى شىعۋى ەبدەن مٷمكٸن. بانك تٸس پەن يمپلانتتىڭ سانىن تەكسەرە المايدى. سوندىقتان سالىمشىعا سەنۋگە تۋرا كەلەدٸ", - دەيدٸ يبراگيموۆا.
