Zeinetaqy jinaǵy esebinen turǵyn úi satyp alý boiynsha eń iri mámile 162 million teńgeden asty. Bul týraly "Otbasy bank" AQ basqarma tóraǵasy Lázzat Ibragimova aitty, dep habarlaidy Sputnik Qazaqstan.
"Iá, zeinetaqy jinaǵyna turǵyn úi satyp alýǵa qatysty eń iri mámileniń somasy 162,4 million teńge boldy. Bul premiým-klasqa jatatyn baspana bolýy kerek. Al eń az mámileniń somasy million teńgeniń shamasynda boldy. Ony aýyldy jerde nemese aýdan ortalyǵynda paidalanǵan sekildi", - dedi Ibragimova ortalyq kommýnikatsiialar qyzmetinde ótken onlain brifingte.
Onyń aitýynsha, biyl zeinetaqy jinaǵynyń bir bóligin paidalanýǵa ruqsat berilgennen keiin baspana satyp alý kórsetkishi kúrt ósti. Sonyń saldarynan turǵyn úi baǵasy da kóterildi.
"2021 jyly satý-satyp alý kelisimsharttarynyń sany ótken jylmen salystyrǵanda áldeqaida kóp boldy. Osy kúnge deiin ipotekasyz 179 192 mámile jasaldy. Adamdar kredit almai, úidi tolyǵymen satyp aldy", - dep atap ótti Ibragimova.
Bank basshysy zeinetaqy jinaǵy esebinen 17 million teńgege tisin emdetken salymshy týraly da aitty.
"Ondaida klinikamen jasalǵan kelisimshart pen tólenetin shotty usyný qajet. Implantatsiia qymbat bolady. Shveitsariialyq nemese izraildik implant bar. Sosyn 18-19 implant qoisa, 17 million teńgeniń esepshoty shyǵýy ábden múmkin. Bank tis pen implanttyń sanyn teksere almaidy. Sondyqtan salymshyǵa senýge týra keledi", - deidi Ibragimova.
