بٷگٸن سەربييا استاناسى بەلگراد قالاسىندا بوكستان ەلەم چەمپيوناتى باستالادى, دەپ حابارلايدى قازاقپارات.
جارىستىڭ العاشقى كٷنٸندە قازاقستاندىق ەكٸ بوكسشى شارشى الاڭعا شىعادى.
سەرٸك تەمٸرجانوۆ 1/32 فينالدا موڭعولييالىق ەنح-امار حارحۋۋمەن قولعاپ تٷيٸستٸرەدٸ. ول 57 كەلٸدە سىنعا تٷسەدٸ
س.تەمٸرجانوۆ 1998 جىلى دٷنيەگە كەلگەن. بۇعان دەيٸن 2020 جىلعى توكيو وليمپياداسىندا باق سىنادى.
تاعى بٸر جەكپە-جەكتە ابىلايحان جٷسٸپوۆ (67 كەلٸ) تايبەيدەن كەلگەن يۋ لينمەن شەبەرلٸك بايقاسادى.
ا.جٷسٸپوۆ 1997 جىلى دٷنيەگە كەلگەن. 2017, 2019 جىلداردا ەلەم چەمپيوناتىندا قولا جٷلدەگەر اتانسا, 2017 جىلى ازييا چەمپيوناتىندا كٷمٸس الدى.
ول بيىلعى ەلەم چەمپيوناتىندا ۇلتتىق قۇرامانىڭ كاپيتانى مٸندەتٸن اتقارادى.
ەسكە سالساق, ۇلتتىق قۇرامانىڭ باس باپكەرٸ قايرات سەتجانوۆ دٷبٸرلٸ دودادا ولاردان باسقا تەمٸرتاس جٷسٸپوۆ (48 كەلٸ), سەكەن بيبوسىنوۆ (51 كەلٸ), ماحمۋد سابىرحان (54 كەلٸ), ساماتالي تٶلتاەۆ (60 كەلٸ), ساناتالي تٶلتاەۆ (63,5 كەلٸ), اسلانبەك شىمبەرگەنوۆ (71 كەلٸ), نۇرقانات رايس (75 كەلٸ), نۇربەك ورالباي (80 كەلٸ), بەك نۇرماعامبەت (86 كەلٸ), ايبەك ورالباي (92 كەلٸ) مەن نۇرلان ساپارباي (92 كەلٸدەن جوعارى) سىندى سپورتشىلارعا سەنٸم ارتتى.
جەكپە-جەك ەلوردا ۋاقىتىمەن 22.00-دە «Qazsport» تەلەارناسى ارقىلى تٸكەلەي ەفيردە كٶرسەتٸلەدٸ.
دٷنيەجٷزٸلٸك دودا 1974 جىلدان بەرٸ تۇراقتى تٷردە ۇيىمداستىرىلادى. قازاقستان قۇراماسى بٷگٸنگە دەيٸن 12 التىن, 13 كٷمٸس, 21 قولا جٷلدە الدى.
بيىل ەلەم چەمپيوناتىنا 100-دەن استام ەلدەن 650-گە جۋىق سپورتشى كەلەدٸ.
جارىسقا وليمپيادا چەمپيوندارى, ازييا, ەۋروپا جٷلدەگەرلەرٸ, ەلەم چەمپيوندارى دا قاتىسادى دەپ كٷتٸلۋدە.
ايتا كەتەيٸك, ەلەم چەمپيوناتىنىڭ جالپى جٷلدە قورى - 2,6 ملن اقش دوللار. جەڭٸمپاز 100 000 دوللار السا, كٷمٸس جٷلدەگەر 50 000, قولا جٷلدەگەر 25 000 دوللار الادى.
