بوكسشى تەمٸرتاس جٷسٸپوۆ قىتايدا ٶتكەن دٷنيەجٷزٸلٸك ەسكەري ويىنداردا چەمپيون اتاندى, دەپ حابارلايدى "ۇلت اقپارات" اقمولا وبلىسىنىڭ دەنەشىنىقتىرۋ جەنە سپورت باسقارماسىنىڭ باسپاسٶز قىزمەتٸنە سٸلتەمە جاساپ.
ۆەدومستۆونىڭ مەلٸمەتٸشە, قىتايدىڭ ۋحان قالاسىندا 7-شٸ جازعى دٷنيەجٷزٸلٸك ەسكەري ويىندارى ٶتٸپ, بوكستان 49 كەلٸ سالماقتا شارشى الاڭعا شىققان اقمولالىق بىلعارى قولعاپ شەبەرٸ تەمٸرتاس جٷسٸپوۆ بٸرٸنشٸ ورىندى جەڭٸپ الدى.
«جەرلەسٸمٸز نيگەرييا, كەنييا, كولۋمبييا, كحدر جەنە ٷندٸستاننان كەلگەن بوكسشىلارىمەن قولعاپ تٷيٸستٸردٸ. بەس كەزدەسۋدٸڭ بارلىعىندا تەمٸرتاس جوعارى شەبەرلٸك تانىتىپ, قارسىلاستارىن ايقىن باسىمدىقپەن جەڭدٸ», - دەيدٸ ۆەدومستۆونىڭ باسپاسٶز قىزمەتٸندەگٸلەر.
تۋرنيردٸڭ سەگٸزٸنشٸ كٷنگٸ نەتيجەسٸ بويىنشا قازاقستان قۇراماسى جالپى كوماندالىق ەسەپتە 109 ەلدٸڭ ٸشٸندە 11 ورىننان كٶرٸندٸ. ۇلتتىق قۇراما قورجىنىندا 4 التىن, 3 كٷمٸس جەنە 5 قولا مەدال بار.
