بقو-دا ەسكٸ توڭازىتقىشتىڭ ٸشٸنەن 5 جاسار بالانىڭ دەنەسٸ تابىلدى, – دەپ حابارلايدى "ۇلت اقپارات" Polisia.kz سايتىنا سٸلتەمە جاساپ.
8 تامىز ساعات 22:00 شاماسىندا بەيتەرەك اۋدانىندا ورنالاسقان جەكە ٷيدٸڭ اۋلاسىنداعى مير ماركالى توڭازىتقىشتان 5 جاسار بالانىڭ مەيٸتٸ تابىلدى. ونىڭ دەنەسٸن اناسى تاپقان.
ەيەلدٸڭ ايتۋىنشا, ٷش بالاسى كٶشەدە ويناپ جٷرگەن. بٸراق كەشكە قاراي ٷيگە ەكەۋٸ عانا ورالعان. مۇنى بٸلگەن ەيەل كٸشٸ ۇلىن بٸر ساعات بويى اۋدان ٸشٸنەن ٸزدەگەن. كەيٸن ٷيٸنٸڭ اۋلاسىنا كٸرٸپ, جۇمىس ٸستەمەيتٸن ەسكٸ توڭازىتقىشتان بٷلدٸرشٸننٸڭ دەنەسٸن تاپقان. جاس انا جەدەل جەردەم شاقىرعانىمەن, دەرٸگەرلەر سەبيدٸڭ كٶز جۇمعانىن ايتقان.
مەديتسينالىق ساراپتاما قورىتىندىسى بويىنشا, ونىڭ ٶلٸمٸنە "تىنىس الۋ جولدارىنىڭ اسپيراتسيياسىنان تۋىنداعان مەحانيكالىق اسفيكسييا" سەبەپ بولعانى انىقتالدى.
"بۇل كەڭەستٸك توڭازىتقىشتا ەسٸكتٸڭ مەتالل تۇتقاسىندا ورنالاسقان اۆتوماتتى قۇلىپتاۋ جٷيەسٸ بار. ەگەر سٸز ەسٸكتٸ يتەرسەڭٸز, قۇلىپ جابىلىپ قالادى. توڭازىتقىشتىڭ سىرتىنداعى تۇتقانى تارتىپ العانشا توڭازىتقىشتى ٸشٸنەن اشۋ مٷمكٸن ەمەس", – دەپ حابارلايدى پوليتسييا دەپارتامەنتٸنٸڭ ٶكٸلٸ داريعا مەجيتوۆا.
سوتقا دەيٸنگٸ تەرگەۋ اياسىندا بالانىڭ مەيٸتٸنە مەديتسينالىق زەرتتەۋ تاعايىندالدى. اتالعان فاكت جازاتايىم وقيعا رەتٸندە تٸركەلدٸ.
جازاتايىم وقيعالاردىڭ الدىن الۋ ٷشٸن پوليتسييا دەپارتامەنتٸ بارلىق اتا-اناعا كٸشكەنتاي بالالاردىڭ ٶمٸرٸنە قاۋٸپتٸ بولۋى مٷمكٸن, ساياجايلار مەن جەكە اۋلالاردا تۇرعان ەسكٸ توڭازىتقىشتارعا ەرەكشە نازار اۋدارۋدى سۇرايدى.
