باتىس قازاقستاندا «كيٸك» جەدەل ٸزدەستٸرۋ شاراسى كەزٸندە تابيعات ينسپەكتورلارى ەكٸ كٶلٸككە مٸنگەن براكونەرلەردٸ ۇستادى, دەپ حابارلايدى "ۇلت اقپارات".
«2020 جىلدىڭ 18 مامىرىندا ارنايى «كيٸك» جەدەل ٸزدەستٸرۋ شاراسى بارىسىندا كيٸك اۋلاپ, دەريۆاتتاردىڭ زاڭسىز اينالىمىمەن اينالىسقان باتىس قازاقستاننىڭ تٶرت ازاماتى ۇستالدى. وپەراتسييا كەزٸندە رەسەيلٸك «نيسسان», «نيۆا شەۆرولە» كٶلٸكتەرٸنەن كيٸكتٸڭ 434 مٷيٸزٸ, موتوتسيكل, 5 قارۋ (ٸشٸندە وپتيكامەن كٶزدەپ اتاتىنى دا بار), ەرتٷرلٸ كاليبرلٸ 293 پاترون, تٷندە كٶرە الاتىن قۇرىلعى, راديستانتسييالار, GPS ناۆيگاتور, 7 موبيلدٸ تەلەفون مەن 2 پلانشەت, ارا مەن پىشاق, تاعى باسقا زاتتار تابىلدى», - دەپ جازادى سەكەن دٸلداحمەت.
اتالمىش فاكت بويىنشا قر قىلمىستىق كودەكسٸنٸڭ 339-بابى بويىنشا سوتقا دەيٸنگٸ تەرگەۋ امالدارى جٷرگٸزٸلٸپ جاتىر.
ايتا كەتەرلٸگٸ, 15 سەۋٸردەن باستاپ قازاقستاندا براكونەرلٸككە قارسى «كيٸك» اتتى كەڭ اۋقىمدى اكتسييا جٷرگٸزٸلٸپ جاتىر.
