فوتو: مەجٸلٸس باسپاسٶز قىزمەتٸنەن
بٷگٸن مەجٸلٸستٸڭ جالپى وتىرىسىندا دەپۋتات نارتاي سەرسەنعاليەۆ 4 قازاندا تالعار اۋدانىندا بولعان جاسٶسپٸرٸمنٸڭ ٶلٸمٸنە قاتىستى قىلمىس تۋرالى مەسەلە كٶتەرٸپ, دەپۋتاتتىق ساۋال جولدادى, دەپ حابارلايدى Ult.kz.
قازاقستان رەسپۋبليكاسىنىڭ باس پروكۋرورى ب.ن. اسىلوۆقا, ٸشكٸ ٸستەر مينيسترٸ ە.س. سەدەنوۆكە جەنە وقۋ-اعارتۋ مينيسترٸ ع.ب. بەيسەمباەۆقا جولدادى.
"بٸزدٸڭ قوعام قايدا بارا جاتىر?", – دەگەن سۇراقتىڭ كٶپشٸلٸكتٸڭ كٶكەيٸندە كٶلكٸپ تۇرۋى زاڭدىلىق وسىندايدا. كەشە عانا تالعارداعى دٷكەندە بولعان جاعداي ەسٸمٸزدٸ ەكەۋ, تٷسٸمٸزدٸ تٶرتەۋ قىلدى. تالعارداعى تەكسٸزدەردٸڭ تەنتەكتٸگٸنەن 16 جاسار بالا, بٸر ەۋلەتتٸڭ ايماڭداي ازاماتى شەرزات كٶز جۇمدى. ەكەسٸ مەن باۋىرى سوققىعا جىعىلدى. بالانىڭ اجالىنا نە سەبەپ دەگەن سۇراق تۋادى. سونداعىسى بٸر بٶتەلكە الكوگول. قازاق: «اراقپەن دوستاستىم دەگەنشە, ادامگەرشٸلٸكپەن قوشتاستىم دە» دەيدٸ. ٸشكٸشتٸڭ ٶزٸ ادامگەرشٸلٸگٸمەن قوشتاسىپ قانا قويماي, كٸنەسٸز كٸسٸلەردٸڭ ٶمٸرٸمەن قوشتاسۋىنا سەبەپ بولعانى قاتتى قاپالاندىرادى.
وسىندايدا بٸزدٸڭ قوعام قاۋٸپسٸز بە ٶزٸ, زاڭ كٸمنٸڭ جاعىندا دەگەن سۇراق تۋادى. سەبەبٸ شەرزاتتىڭ ەكەسٸ تەرگەۋدٸڭ تۇرالاپ تۇرعانىن, اۋدانداعى قۇزىرلى ورىن ٶكٸلدەرٸنٸڭ ٸستٸ سوزباققا سالىپ جاتقانىن, قىلمىسكەردٸ قويىپ بالاسىنان ايرىلعان وتباسىن تٷندە تەرگەۋگە شاقىرىپ الىپ ٶكتەم سٶيلەگەنٸن ايتىپ بەينەٷندەۋ جاسادى. ەل ٶرە تٷرەگەلدٸ, ارتىنشا «ٸستٸ ٸٸم-ٸ ٶز باقىلاۋىنا الدى» دەگەن اقپارات تارادى. قوعامدى قورقىتاتىنى وسى, قىلمىسكەردٸ جازالاۋ ٷشٸن, ەدٸلدٸككە جەتۋ ٷشٸن بەينەٷندەۋ جاساپ ەر ٸستٸ بٸر مينيستردٸڭ باقىلاۋعا العانىن كٷتٸپ وتىرۋ كەرەك پە? نەگە جەرگٸلٸكتٸ جەردەگٸ قۇقىق قورعاۋ ورىندارى دەرەۋ ٸستٸڭ اق-قاراسىن انىقتاپ ەدٸل تەرگەۋ ٶتكٸزبەيدٸ?" -دەدٸ ن. سەرسەنعاليەۆ.
دەپۋتات قىلمىس ورىن العاندا قۇقىق قورعاۋ ورگاندارى بٸردەن ەرەكەت ەتۋٸ كەرەك. ەيتپەسە, جاپا شەككەن وتباسىنىڭ مٷشەلەرٸ اشۋعا بوي الدىرىپ, قىلمىسكەردٸ جازالاۋعا ٶزدەرٸ بەكٸنۋٸ مٷمكٸن ەكەنٸن جەتكٸزدٸ.
"سوندىقتان وعان قوسا مەملەكەتتٸك دەڭگەيدە پوليتسييا مەن قۇقىق قورعاۋ ورگاندارىنا دەگەن سەنٸمدٸلٸكتٸ ارتتىراتىن جۇمىستاردى ٸسكە اسىرۋ ماڭىزدى دەپ بٸلەمٸن.
قاپەرلەرٸڭٸزگە تاعى بٸر جايتتى سالايىن, وسى جىلدىڭ قىركٷيەگٸندە اقتٶبە وبلىسىندا 14 جاسار سىدىق نۇرجاندى جوعارعى سىنىپتا وقيتىن ون شاقتى وقۋشى جابىلىپ ساباعان, سالدارىنان بالا كٶز جۇمدى. ول كەزدە دە مارقۇمنىڭ ەپكەسٸ ەلەۋمەتتٸك جەلٸگە شىعىپ ەدٸلدٸك ٸزدەپ قۇزىرلى ورگاندارعا جٷگٸندٸ. قىلمىسكەرلەر جازاسىز قالمايتىنىنا سەنسە جۇرت بۇلاي شارق ۇرماس ەدٸ.
سول الماتى وبلىسىنىڭ تالعار اۋدانىندا قىركٷيەك ايىنىڭ سوڭىندا بٸر تەربيەسٸز بۇزاقىنىڭ كٸشكەنتاي بالانى اياۋسىز ساباعانى تٷسٸرٸلگەن بەينەجازبا تاراعان ەدٸ. ول كەزدە الماتى وبلىسىنىڭ پوليتسەيلەرٸ ٸستٸ باقىلاۋعا الدىق دەدٸ. الايدا ارادا اپتا ٶتكەندە سول تالعاردا 16 جاسار ۇلدى بٸر توپ قىلمىسكەر ٶلتٸرٸپ كەتكەنٸن ەستٸپ-بٸلٸپ وتىرمىز.
جاسٶسپٸرٸمدەر جاپا شەككەن جاعدايلاردى تٸزسەم تاڭدى تاڭعا ۇرۋعا تۋرا كەلەدٸ: قىركٷيەكتە پاۆلودار وبلىسىنىڭ كەنجەكٶل اۋىلىندا بٸر توپ بۇزاقى بٸر جاسٶسپٸرٸمدٸ اياۋسىز ساباپ تاستادى. اقتاۋدا جاسٶپٸرٸمدەردٸڭ جاپپاي تٶبەلەسٸ تٷسٸرٸلگەن ۆيدەو تارادى وسى اپتادا, ول جەردە توپ-توپقا بٶلٸنگەن بالالار بٸر-بٸرٸن اياۋسىز ساباپ جاتىر. ارتىنشا سول اقتاۋدا بٸرنەشە قىزدىڭ بٸر قىزدى ۇرىپ قورلاپ جاتقانى تٷسٸرٸلگەن بەينەجازبا جەلٸنٸ كەزٸپ كەتتٸ. بۇل تەك سوڭعى ايداعى جايتتار", -دەدٸ ول ٶز سٶزٸندە.
دەپۋتات قۇزىرلى ورگاندارعا تٶرت ۇسىنىس جاسادى:
1. الماتى وبلىسى تالعار اۋدانىندا 16 جاسار ازاماتتى ٶلتٸرگەن, جاقىندارىن اياۋسىز ساباعان قىلمىسكەرلەر قاماۋعا الىنىپ, ولارعا زاڭعا سەيكەس ەدٸل جازا بەرٸلۋٸ تيٸس.
2. اتالعان ٸس بويىنشا بارلىق قۇقىق قورعاۋ ورگاندارى تٸزە قوسىپ, وقيعانىڭ زاڭدى قۇقىقتىق باعاسىن تەز ارادا بەرۋٸ قاجەت.
3. بٸلٸم بەرۋ ۇيىمدارىندا «قۇقىق نەگٸزدەرٸ» اتتى پەن بار. بٸراق ونىڭ ساپاسىنا قاتىستى سىن كٶپ. اتالعان پەننٸڭ باعدارلاماسىن قايتا جاساپ, بالالار ٶمٸردە بەتپە-بەت كەلەتٸن جايتتار مەن ٶمٸردەن الىنعان ناقتى كەيستەرگە سٷيەنٸپ وقىتۋ كەرەك.
4. مەملەكەت باسشىسى ۇسىنعان زاڭ مەن تەرتٸپ قاعيداتىنا سٷيەنە وتىرىپ, ەلدەگٸ قۇقىق قورعاۋ جٷيەسٸنە, پوليتسيياعا دەگەن حالىق سەنٸمٸن كٷشەيتۋ, قوعام كٶزقاراسىن ٶزگەرتۋ بويىنشا جالپىمەملەكەتتٸك دەڭگەيدە كەشەندٸ شارالار قابىلداۋ قاجەت. ول ٷشٸن حالىققا ادال قىزمەت ەتۋ كەرەك, ادال قىزمەت بولماسا, سەنٸم بولمايدى, ال سەنٸمسٸز اتقارىلعان ٸستٸڭ بەرٸ ەش كەتەتٸنٸ ەمبەگە ايان.
وقي وتىرىڭىز: تالعاردا 16 جاستاعى جاسٶسپٸرٸمنٸڭ قازاسى: تۋىستارى ەدٸل تەرگەۋ جٷرگٸزۋدٸ تالاپ ەتتٸ
