جەر رەفورماسى جٶنٸندەگٸ كوميسسييانىڭ بٸرٸنشٸ وتىرىسىندا قوعام قايراتكەرٸ مۇحتار تايجان كەپٸلدٸكتە تۇرعان جەرلەرگە قاتىستى ۇسىنىس ايتتى, دەپ حابارلايدى "ۇلت اقپارات".
«كەلەسٸ مەنٸڭ ۇسىنىسىم, بٸرىڭعاي اگرارلىق سالىعىنا قاتىستى. بٷگٸنگٸ تاڭدا ادام جەردٸ بوس ۇستايتىن بولسا, جەر سالىعى ٶتە تٶمەن. ال ەگەر جۇمىس ٸستەيتٸن بولسا, قوسىمشا 7-8 سالىق قوسالادى. ياعني, سالىق جاعىنان, ەكونوميكالىق جاعىنان جۇمىس ٸستەۋ تيٸمسٸز. سوندىقتان بٸرىڭعاي اگرارلىق سالىق ەنگٸزۋٸمٸز كەرەك», - دەدٸ قوعام قايراتكەرٸ.
وسى ورايدا ول فەرمەر جەردٸ قايتارۋعا نەمەسە سول القاپتى يگەرۋگە مەجبٷر بولاتىنىن ايتتى.
سونىمەن قاتار مۇحتار تايجان كەلەسٸ ٷلكەن پروبلەما بانكتەردە تۇرعان جەرلەرگە قاتىستى ەكەنٸن, اۋقىمدى القاپ بانكتەردە كەپٸلدٸكتە تۇرعانىن جەتكٸزدٸ.
«بۇل - ٶز كەزەگٸندە ٷلكەن پروبلەما. وسى ورايدا مەملەكەت, ٷكٸمەت بٸرجاقتى تٷردە وسى كەلٸسٸمشارتتاردى بۇزىپ, مەملەكەتتٸك قاجەتتٸلٸك تۇرعىسىندا سول جەرلەردٸ مەملەكەت مەنشٸگٸنە قايتارۋى كەرەك», - دەدٸ ول.
ودان بٶلەك قوعام قايراتكەرٸ جەر بويىنشا قوسالقى جالگەرلٸككە جول بەرٸلمەۋٸ كەرەك ەكەنٸن باسا ايتتى.
«كەلەسٸ مەسەلە – ول سۋبارەندا. قوسالقى جالگەرلٸككە جول بەرٸلمەۋٸ كەرەك, ياعني ول لاتيفۋنديستەردٸڭ نەگٸزٸ. سۋبارەنداعا جول بەرٸلسە, وندا جەرگٸلٸكتٸ حالىق ەشقاشان سول جەرگە قول جەتكٸزە المايدى», - دەدٸ تايجان.
سونىمەن قاتار ول جەر كوميتەتٸنٸڭ (قر اشم جەر رەسۋرستارىن باسقارۋ كوميتەتٸ) كٷشٸ ەلسٸز ەكەنٸن, ٶيتكەنٸ جەرگٸلٸكتٸ جەر ينسپەكتورلارى ەكٸمدەرگە قارايتىنىن ەسكەرتتٸ. ەكٸمدەر بٸر قولمەن جەردٸ بٶلەدٸ دە, ەكٸنشٸدەن, ونى ٶزٸ باقىلاپ وتىرادى.
قوعام قايراتكەرٸنٸڭ ايتۋىنشا, جەر ينسپەكتورلارى, ياعني باقىلاۋ فۋنكتسييالارى تيٸستٸ قۇرىلىمنىڭ قاراماعىندا بولۋى كەرەك. بۇل قۇرىلىمدى اۋىل شارۋاشىلىعى مينيسترلٸگٸنەن شىعارىپ, تٸكەلەي پرەزيدەنتكە باعىندىرعان دۇرىس بولادى.
«سوندا عانا ەلٸمٸزدەگٸ جەر القاپتارى بويىنشا تەرتٸپ ورناتىلادى دەپ ٷمٸتتەنەمٸن», - دەدٸ مۇحتار تايجان.
