دەنساۋلىق ساقتاۋ مينيسترلٸگٸنٸڭ بۇرىنعى باسشىسى ەلجان بٸرتانوۆتىڭ ادۆوكاتى نۇرلان بەيسەكەەۆ سۋديا يبراگيم ەلكەنوۆتٸڭ پروتسەستٸ جٷرگٸزۋٸنە تاعى دا قارسىلىق بٸلدٸردٸ. دەگەنمەن ول تالابى ماقۇلدانبادى, دەپ حابارلايدى قازاقپارات.
قورعاۋشىنىڭ ايتۋىنشا, بۇل جولى قارسىلىق بٸلدٸرۋٸنە سۋديانىڭ زارداپ شەگۋشٸ تاراپتىڭ ٶكٸلٸن ٸستەن شەتتەتۋ تۋرالى ٶتٸنٸشتەن باس تارتقانى سەبەپ بولعان.
قورعاۋشى ەرجان بٸرتاننىڭ سٶزٸنە قاراعاندا, اسقار اقباەۆ – قازاقستاننىڭ دەنساۋلىق ساقتاۋ مينيسترلٸگٸ مەن Ericsson Nicola Tesla كومپانيياسىنىڭ اراسىنداعى كەلٸسٸمشارتقا قول قويعان ادامنىڭ بٸرٸ.
سوندىقتان زارداپ شەگۋشٸ تاراپتىڭ ٶكٸلٸ رەتٸندە ەمەس, كۋەگەر رەتٸندە عانا پروتسەسكە قاتىسا الادى.
قورعاۋشى تاراپتىڭ ٶتٸنٸشٸن قاراعان سۋديا بۇل تالاپتى قاناعاتتاندىرماي تاستادى.
«سۋديا ەلكەنوۆتٸ بۇل ٸستٸ قاراۋدان شەتتەتۋگە نەگٸز بولاتىن سەبەپ كٶرمەدٸم. ٶيتكەنٸ بۇعان دەيٸن دە قورعاۋشى تاراپ دەل وسىنداي تالاپ قويعان بولاتىن. اقباەۆتان كۋەگەر رەتٸندە جاۋاپ الىپ, زارداپ شەگۋشٸ تاراپتىڭ ٶكٸلٸ رەتٸندە قاتىستىرماۋ تۋرالى ٶتٸنٸش تٷسٸرگەن. سوت بۇل جايت سۋديا ەلكەنوۆتٸ ٸستٸ قاراۋدان شەتتەتۋگە نەگٸز بولا المايدى دەپ ەسەپتەيدٸ», - دەپ تٷسٸندٸردٸ №2 سارىارقا اۋداندىق سوتىنىڭ سۋدياسى سابىرجان كەرٸموۆ.
بٷگٸن بٸرتانوۆ ٸسٸنە قاتىسى بار اعىلشىن تٸلٸندەگٸ قۇجاتتاردى ورىسشاعا اۋداراتىن مامان تاڭدالۋى كەرەك بولعان.
ادۆوكات نۇرلان بەيسەكەەۆ سۋديا يبراگيم ەلكەنوۆتٸڭ اۋدارماشىعا كەسٸبي بٸلٸكتٸلٸگٸنە قاتىستى سۇراق قويۋىنا تىيىم سالعانىنا دا نارازىلىق بٸلدٸردٸ.
ايتۋىنشا, سۋديانىڭ ادۆوكاتتارعا ٸسكە قاتىستى قۇجاتتاردى اعىلشىن تٸلٸنەن ورىسشاعا اۋدارعان ماماننىڭ بٸلٸكتٸلٸگٸنە قاتىستى سۇراق قويۋىنا تىيىم سالۋى قىلمىستىق-پروتسەسسۋالدىق زاڭناماعا قايشى.
ٶتكەن وتىرىستا اۋدارماشى ەكس-مينيستر مەن بۇرىنعى ۆيتسە-مينيستر ولجاس ەبٸشەۆتٸڭ ادۆوكاتتارى اۋدارماشىنى سۇراقتىڭ استىنا الىپ, ول ٸسكە قاتىسۋدان باس تارتقان بولاتىن.
وسىنى العا تارتقان سۋديا ادۆوكاتتاردىڭ اۋدارماشىعا كەسٸبي بٸلٸكتٸلٸگٸ تۋرالى سۇراق قويۋىنا تىيىم سالعان.
ەسكە سالساق, بۇرىنعى دەنساۋلىق ساقتاۋ مينيسترٸ ەلجان بٸرتانوۆ 2020 جىلدىڭ 3 قاراشاسىندا بيۋدجەت قاراجاتىن ىسىراپ ەتتٸ دەگەن كٷدٸكپەن قاماۋعا الىنعان بولاتىن.
تەرگەۋ ماتەريالى بويىنشا, ەلجان بٸرتانوۆ پەن ونىڭ ورىنباسارى ولجاس ەبٸشەۆكە Ericsson Nicola Tesla كومپانيياسىنىڭ قىزمەتٸن پايدالانۋ كەزٸندە «لاۋازىمدىق ٶكٸلەتٸن تەرٸس پايدالانۋ» ارقىلى مەملەكەتكە 1,5 ملرد تەڭگەنٸڭ شىعىنى كەلتٸردٸ دەگەن ايىپ تاعىلىپ وتىر.
ال بيىل 12 مامىردا سوت ەلجان بٸرتانوۆقا قاتىستى قىلمىستىق ٸستٸ توقتاتۋدان باس تارتتى.
