كارانتيندە ٶزٸمٸزدٸ دۇرىس ۇستاساق, اتالعان ينفەكتسييانى توقتاتامىز. بۇل تۋرالى ەلدەگٸ كوروناۆيرۋس ينفەكتسيياسى بويىنشا اعىمداعى جاعداي جايلى ونلاين بريفينگتە ايتىلدى, دەپ حابارلايدى قازاقپارات.
«كارانتين شارالارى ٶتە ماڭىزدى. بٸرٸنشٸدەن, كٶشەگە شىقپاي, ٷيدە وتىرۋىڭىز كەرەك. قازٸرگٸ ۋاقىتتا كٶپ قالالاردا ٷلكەن عيماراتتار, دٷكەندەر جابىلۋدا. بارلىق جۇمىسشىلار مٷمكٸندٸگٸنشە قاشىقتان جۇمىس ٸستەۋگە كٶشۋٸ تيٸس. جۇمىستا ينفەكتسييا جۇقتىرۋدىڭ الدىن الۋ ٷشٸن وسىنداي شارالار قولدانىپ وتىرمىز», - دەيدٸ قر دەنساۋلىق ساقتاۋ مينيسترٸ ەلجان بٸرتانوۆ.
ەكٸنشٸدەن, كٶشەگە ارى كەتسە ەكٸ ادام بولىپ شىعۋعا رۇقسات, بٸراق كەي قالالاردا بۇل دا ٶتە قاۋٸپتٸ. مٷمكٸندٸك بولسا, وسى ەكٸ اپتادا كٶشەگە مٷلدە شىقپاعان جٶن.
«اۋىلدىق جەردە ٷلكەن وتباسىندا تۇراتىندار قارت ادامداردى بٶلەك بٶلمەدە ۇستاپ, ٶزدەرٸڭٸز دە بٶلەك بٶلمەدە وتىرعاندارىڭىز دۇرىس. كارانتيندە ٶزٸمٸزدٸ دۇرىس ۇستاساق, اتالعان ينفەكتسييانى توقتاتامىز. ەكٸ اپتا, ەكٸ ادام, ەكٸ مەتر – وسى تالاپتاردى ساقتاۋىمىز كەرەك», دەپ اتاپ ٶتتٸ مينيستر.
