ۇلتتىق قوعامدىق سەنٸم كەڭەسٸ قۇرىلعالى 1 جىلدان استام ۋاقىتتا بٸلٸم بەرۋگە قاتىستى ماڭىزدى مەسەلەلەر كٶتەرٸلٸپ كەلەدٸ. ۇلتتىق كەڭەستە وسى سالادا قانداي ۇسىنىستار ايتىلدى, پاندەمييا كەزٸندەگٸ قاشىقتان وقىتۋعا دايىن بولدىق پا? وسى جەنە ٶزگە دە مەسەلەلەر جايىندا ۇلتتىق قوعامدىق سەنٸم كەڭەسٸنٸڭ مٷشەسٸ, «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحانۇلىمەن تٸلدەسكەن ەدٸك.
- الدىمەن ۇلتتىق قوعامدىق سەنٸم كەڭەسٸنٸڭ بەلگٸلٸ بٸر سالادا شەشٸم قابىلداۋداعى رٶلٸ جايلى ايتىپ بەرسەڭٸز...
- ۇلتتىق قوعامدىق سەنٸم كەڭەسٸ – مەملەكەت باسشىسىنىڭ قوعام مەن مەملەكەت اراسىنداعى بايلانىستى نىعايتۋ ٷشٸن ەرتٷرلٸ سالالاردا بەلسەندٸلٸك تانىتىپ جٷرگەن, جۇمىس تەجٸريبەسٸ, بٸلٸگٸ مول ازاماتتاردى جيناپ, قوعامدىق ماڭىزى بار مەسەلەلەردٸ تالقىلاۋ, ولاردىڭ شەشٸمٸن بٸرلەسە تابۋ ماقساتىندا قۇرىلعان دەنەكەرلٸك الاڭ, كونسۋلتاتيۆتٸك-كەڭەسشٸ ورگان.
ۇلتتىق قوعامدىق سەنٸم كەڭەسٸنٸڭ وسى ۋاقىتقا دەيٸن ٷش وتىرىسى ٶتتٸ. كەڭەس مٷشەلەرٸ ساياسي مودەرنيزاتسييا, ەكونوميكالىق مودەرنيزاتسييا, ەلەۋمەتتٸك مودەرنيزاتسييا باعىتتارى بويىنشا شارتتى توپتارعا بٶلٸنگەن. ٶز باعىتتارى بويىنشا قوردالانعان مەسەلەلەرگە قاتىسى پٸكٸرلەرٸن بٶلٸسٸپ, تەجٸريبەلەرٸن ورتاعا سالادى, ۇسىنىستارىن دايىندايدى. سول ۇسىنىستاردىڭ نەگٸزٸندە سالاعا جاۋاپتى مەملەكەتتٸك ورگان ٶكٸلدەرٸمەن, تيٸستٸ مينيسترلٸكتەردٸڭ نەمەسە باسقا دا ۆەدومستۆولاردىڭ باسشىلارىمەن كەزدەسەدٸ. ۇسىنىس بەرۋ بار دا, بٸراق ونى جٷزەگە اسىرۋ تەتٸكتەرٸن بٸلۋ, سوعان سەيكەس شەشٸم ۇسىنۋ باسقا. وسى مەسەلەلەر جان-جاقتى تالقىلانادى. وسىلايشا بٸرنەشە رەت تالقىلانعان ۇسىنىستار ۇلتتىق قوعامدىق سەنٸم كەڭەسٸنٸڭ وتىرىسىندا كٶپشٸلٸككە تانىستىرىلادى. ماڭىزدى, شەشۋ, ٸسكە اسىرۋ جولى انىقتالعان ۇسىنىستاردى پرەزيدەنت ٷكٸمەتكە تاپسىرما رەتٸندە بەرەدٸ. قازٸر وسىنداي جٷيەلٸ نەگٸزدە جۇمىس جٷرٸپ جاتىر.
- وسى الاڭدا كٶتەرٸلگەن بٸلٸم بەرۋ سالاسىنا قاتىستى ناقتى ۇسىنىستار جايلى ايتىپ ٶتسەڭٸز. كەڭەس مٷشەسٸ رەتٸندە ٶزٸڭٸز قانداي مەسەلەلەردٸ كٶتەردٸڭٸز?
- مەن كەڭەس اياسىنداعى ەلەۋمەتتٸك مەسەلەلەرمەن اينالىساتىن توپتىڭ مٷشەسٸمٸن. بۇل توپ دەنساۋلىق ساقتاۋ, بٸلٸم بەرۋ, ەلەۋمەتتٸك قامسىزداندىرۋ سەكٸلدٸ ەلەۋمەتتٸك مەسەلەلەرگە قاتىستى ۇسىنىستاردى تالقىلاپ, جيناقتايدى. ۇلتتىق قوعامدىق سەنٸم كەڭەسٸنٸڭ مامىر ايىنداعى ٷشٸنشٸ وتىرىسى بٸلٸم بەرۋ مەسەلەلەرٸنە ارنالدى. پرەزيدەنتتٸڭ وسىنداي كەڭەستٸڭ بٸر وتىرىسىن تەك بٸلٸم سالاسىنا ارناۋى ٶتە ماڭىزدى, دۇرىس قادام بولدى دەپ ەسەپتەيمٸن. ەلٸمٸزدٸڭ قاي سالادا بولماسىن ٸلگەرٸلەۋٸنە, العا جىلجۋىنا, دامۋىنا تٸكەلەي ەسەر ەتەتٸن سالا – وسى بٸلٸم بەرۋ جٷيەسٸ. بٸز بۇل كەزدەسۋگە دايىندىق اياسىندا بٸلٸم جەنە عىلىم مينيسترٸمەن, پرەمەر-مينيستردٸڭ ەلەۋمەتتٸك سالاعا جاۋاپ بەرەتٸن ورىنباسارىمەن كەزدەستٸك.
- وسى ۇسىنىستاردىڭ قايسىسى قوعام قولداۋىنا يە بولىپ, جٷزەگە اسىپ جاتىر? ۇسىنىستار نەگٸزٸندە قانداي زاڭنامالىق اكتٸلەرگە ٶزگەرٸس ەنگٸزٸلدٸ?
- ەرينە, بٸز ايتقان ۇسىنىستاردىڭ بارلىعى بٸردەي ناقتى شەشٸمدەرگە اينالىپ كەتۋٸ مٷمكٸن ەمەس. دەگەنمەن بٸرقاتار ۇسىنىستارىمىز قابىلدانىپ, ەرٸ قاراي ولاردى ٸسكە اسىرۋعا باعىتتالعان ناقتى قادامدار جاسالىپ جاتىر. مەسەلەن, ۇلتتىق قوعامدىق سەنٸم كەڭەسٸ جيىنىندا بولاشاق پەداگوگ مامانداردى دايىنداۋ, مۇعالٸمدەر مەرتەبەسٸن كٶتەرۋ جەنە قورعاۋ مەسەلەلەرٸنە تيٸستٸ دەڭگەيدە نازار اۋدارۋ قاجەتتٸگٸ ايتىلدى. بەرٸلگەن ۇسىنىستاردىڭ نەگٸزٸندە پەداگوگيكالىق ماماندىقتارعا تٷسەتٸن ابيتۋريەنتتەرگە قويىلاتىن تالاپتار كٶتەرٸلدٸ. مۇعالٸم بولعىسى كەلەتٸن تالاپكەر ۇلتتىق بٸرىڭعاي تەستٸلەۋدەن كەم دەگەندە 70 بالل جيناۋى تيٸس. بۇل ٶتە ماڭىزدى. ٶكٸنٸشكە قاراي, سوڭعى جىلدارى بۇل ماماندىققا كەرٸ سۇرىپتاۋ جٷرٸپ, ساپا ٶتە تٶمەندەپ كەتتٸ. سونىمەن بٸرگە, پەداگوگيكالىق ماماندىقتا وقيتىن ستۋدەنتتەرگە تٶلەنەتٸن شەكٸراتقى ەدەۋٸر ٶسٸپ, 42 مىڭ تەڭگە مٶلشەرٸنە دەيٸن كٶتەرٸلدٸ. بۇل دا - قابٸلەتتٸ جاستاردى ىنتالاندىراتىن, ٷستەمەلەيتٸن جاقسى باستاما.
قازٸرگٸ تاڭدا قازاقستانداعى 7 400 مەكتەپتە جالپى سانى 3,5 ميلليوننان اسا وقۋشى بار. ونىڭ 70 پايىزى ەكٸ اۋىسىمدا, 200 مىڭ بالا ٷش اۋىسىمدى مەكتەپتە وقيدى. ساپالى بٸلٸم بەرۋ ٷشٸن مەكتەپتٸڭ بٸر اۋىسىمدا جۇمىس ٸستەۋٸ ٶتە ماڭىزدى. ول ٷشٸن مەكتەپتەر كٶپتەپ سالىنۋى كەرەك. قازٸر كەڭٸنەن قولدانىلىپ جاتقان مەملەكەتتٸك-جەكەشەلٸك ەرٸپتەستٸك مەحانيزمدەرٸن, بٸلٸم بەرۋدٸ جان باسىنا بٶلٸپ قارجىلاندىرۋ سەكٸلدٸ تەتٸكتەردٸ قولدانا وتىرىپ, بٸلٸم بەرۋ ۇيىمدارىنىڭ ەل-اۋقاتىن, ماتەريالدىق تەحنيكالىق بازاسىن نىعايتۋ, مەكتەپتەر سالۋ, ينفراقۇرىلىمىن كٷشەيتۋ كەرەك دەگەن ۇسىنىس ايتتىق.
ودان بٶلەك, قازٸر قاشىقتان وقىتۋ فورماتىن كەڭٸنەن قولدانىپ جاتىرمىز.
- بٷكٸل ەلەمدٸ جايلاعان پاندەمييا بٸلٸم سالاسىنىڭ قانداي ولقى تۇستارىن ايقىنداپ بەردٸ?
- ەرينە, ەلەمدە تاراعان پاندەمييا جاعدايىنا بايلانىستى وسى جٷيەگە كٶشۋگە مەجبٷر بولدىق. بٸراق قاشىقتان وقىتۋ تەحنولوگيياسىن بۇعان دەيٸن دە بەلسەندٸ تٷردە قولدانىپ كەلگەندەر از ەمەس. سوڭعى 10 جىلدا ەلەم بويىنشا قارقىندى دامىعان بۇل تەحنولوگييالار ٶز تيٸمدٸلٸگٸن دەلەلدەدٸ. سوندىقتان قاشىقتان وقىتۋ جٷيەسٸن زاڭ دەڭگەيٸندە رەتتەپ, ونى بٸلٸم تۋرالى زاڭعا ەنگٸزۋ قاجەت. ەرٸ قاشىقتان وقىتۋ تەحنولوگيياسىن قولداناتىن وقۋ ورىندارىنا قويىلاتىن ەدٸستەمەلٸك جەنە تەحنولوگييالىق تالاپتاردى ايقىنداعان ابزال. بۇل مەسەلەگە قاتىستى ۇسىنىستارىمىز بەن زاڭعا ەنۋٸ قاجەت تولىقتىرۋ مەن ٶزگەرٸستەر جوباسىن دايىنداپ بەردٸك. وسىنداي ٸسكە اينالعان, شەشٸمٸن تاپقان, قازٸردٸڭ ٶزٸندە نەتيجەسٸن بەرٸپ جاتقان ۇسىنىستار از ەمەس. بۇل ۇلتتىق قوعامدىق سەنٸم كەڭەس جۇمىسىنىڭ ناقتى نەتيجەسٸ دەۋگە بولادى.
- سۇحباتىڭىزعا راحمەت!
