كەشە مەملەكەت باسشىسى تاپسىرماسىنا سەيكەس كەلەر جىلدان باستاپ ستۋدەنتتەردٸڭ شەكٸرتاقىسى 25%-عا كٶتەرٸلەتٸنٸن ايتتى. وسى ورايدا قر بٸلٸم جەنە عىلىم مينيسترٸ اسحات ايماعامبەتوۆ قانشا قارجى بٶلٸنەتٸنٸن تٷسٸندٸردٸ, دەپ – حابارلايدى «ۇلت اقپارات».
«بٸر جىلدى الىپ قاراساق, جوو ستۋدەنتتەرٸنە 13 ملرد تەڭگە قارجى قاجەت. ال وعان كوللەدج ستۋدەنتتەرٸن قوسساق تاعى 5-6 ملرد تەڭگە كەرەك. يە, نەتيجەسٸندە ايتارلىقتاي سوما, دەگەنمەن بۇل ماڭىزدى شەشٸم. 2016 جىلدان باستاپ ستۋدەنتتەردٸڭ شەكٸرتاقىسى كٶتەرٸلگەن, ولار بۇل جاڭالىقتى كٶپ كٷتتٸ. بٸزدٸڭ ستۋدەنتتەر ٷشٸن بۇل ٷلكەن قولداۋ بولىپ تابىلادى» دەدٸ ا. ايماعامبەتوۆ مينيسترلٸكتە ٶتكەن باسپاسٶز مەسليحاتىندا.
مينيستردٸڭ مەلٸمدەۋٸنشە, بارلىق ساناتقا جاتاتىن ستۋدەنتتەردٸڭ شەكٸرتاقىسى 25 پايىزعا ٶسەدٸ.
«شەكٸرتاقى كٶلەمٸ بارلىق ستۋدەنتتەر ٷشٸن كٶتەرٸلەتٸن بولادى. ٶزدەرٸڭٸز بٸلەتٸندەي, بٸزدە جوعارى دەرەجەلٸ شەكٸرتاقى الاتىن ستۋدەنتتەر بار. ودان بٶلەك, مٷگەدەكتٸگٸ بار, اسىراۋشىسىنان ايىرىلعان جاندار بار. ياعني 25 پايىز بارلىق ستۋدەنتتەرگە قاتىستى», دەدٸ ول.
ايتا كەتسەك, بٷگٸن ەلوردادا ٶتكەن جاستار جىلىنىڭ جابىلۋ سالتاناتى مەن ۆولونتەر جىلىنىڭ رەسمي اشىلۋى سالتاناتىندا مەملەكەت باسشىسى قاسىم-جومارت توقاەۆ 2020 جىلدىڭ 1 قاڭتارىنان باستاپ ستۋدەنتتەردٸڭ شەكٸرتاقىسىن 25 پايىزعا كٶتەرۋدٸ تاپسىردى.
