باشقۇرتستاندا قارتتار ٷيٸ ٶرتەنٸپ, 11 ادام قازا تاپتى, دەپ حابارلايدى باشينفورم اگەنتتٸگٸ.
باشقۇرتستاننىڭ ابزەليلوۆ اۋدانىندا الاپات ٶرت بولدى. يشبۋلدينو اۋىلىنىڭ قىزىل كٶشەسٸندە مانسارداسى بار بٸر قاباتتى عيمارات جانىپ كەتكەن. عيماراتتا قارتتار ٷيٸ ورنالاسقان.
ٶرت سٶندٸرۋشٸلەر جالىندى ەكٸ ساعات ٸشٸندە سٶندٸردٸ. تٶرت ادام سىرتقا ٶزٸ شىعىپ ٷلگەرگەن. جالىندا سٶندٸرگەننەن كەيٸن عيماراتتان 11 ادامنىڭ دەنەسٸ تابىلدى. ولار قارتتار مەن مٷگەدەكتەر بولۋى مٷمكٸن.
«قازا بولعاندار تۋرالى اقپارات ناقتىلانۋدا. ٶرت ورنىنا باشقۇرستان رەسپۋبليكاسى بويىنشا رەسەي تجم باس باسقارماسىنىڭ باستىعى مارات لاتىپوۆ باردى. ٶرتتٸ سٶندٸرۋگە 16 ادام مەن 6 تەحنيكا جۇمىلدىرىلدى», - دەپ حابارلادى رەسپۋبليكانىڭ تجم باسپاسٶز قىزمەتٸ.
تەرگەۋشٸلەر جۇمىسقا كٸرٸسٸپ كەتتٸ. قازا تاپقاندار مەن زارداپ شەككەندەردٸڭ تۋىستارىنا پسيحولوگييالىق كٶمەك كٶرسەتٸلٸپ جاتىر.
اشىق اقپارات كٶزدەرٸنەن بەلگٸلٸ بولعانداي, قارتتار ٷيٸ 2019 جىلدىڭ 27 ناۋرىزىندا تٸركەلگەن.
«ساعات 2:54-تە كەزەكشٸ پۋلتٸنە 1960 جىلدارى سالىنعان, ٸشٸندە 16 ادام تۇرعان عيماراتتا ٶرت شىققانى تۋرالى قوڭىراۋ تٷستٸ. ساعات 3:17-دە وقيعا ورنىنا حاليلوۆ بك ەرٸكتٸ ٶرت سٶندٸرۋ توبى كەلدٸ. بەس ادام ٶرتتەن الىپ شىعارىلدى. دابىل جٷيەسٸ قوسىلعانىمەن, 11 ادامدى قۇتقارۋ مٷمكٸن بولمادى. مەن وقيعا ورنىندامىن. اۋداندا تج رەجيمٸ ەنگٸزٸلدٸ», — دەپ مەلٸمدەدٸ ابزەليلوۆ اۋدانى باسشىسى يلدار نافيكوۆ.
