قادٸرلٸ جاماعات!
بارشاڭىزعا قاسيەتتٸ قادٸر كەشٸ مٷبەراك بولسىن!
اللا تاعالا حاق ەلشٸسٸنە (اللانىڭ وعان سالاۋاتى مەن سەلەمٸ بولسىن):
لَيْلَةُ الْقَدْرِ خَيْرٌ مِّنْ أَلْفِ شَهْر
«قادٸر تٷنٸ مىڭ ايدان دا قايىرلى» (قادٸر, 2-3) – دەگەن اياتتى نەزٸل ەتٸپ, مۇسىلمان ٷمبەتٸن تەڭدەسسٸز قۋانىشپەن سٷيٸنشٸلەگەن.
ەلبەتتە, بۇل – اللا تاعالانىڭ مۇسىلمان ٷمبەتٸنە دەگەن شەكسٸز قامقورلىعى مەن راقىمى. ٶيتكەنٸ, مىڭ ايدى جىلدارعا شاعاتىن بولساق, سەكسەن ٷش جىلدان استام مەزگٸلدٸ قامتيدى. بۇل دەگەنٸمٸز – بٸر ادامنىڭ ٶمٸرٸنە تاتيتىن ۋاقىت مٶلشەرٸ. ياعني, قادٸر تٷنٸندە حاق تاعالاعا ىنتى-شىنتىمەن قۇلشىلىق ەتكەن پەندە عۇمىر بويى قۇلشىلىق ەتكەن بولىپ سانالادى. ال, ەر جىل سايىنعى قادٸر تٷنٸن قاپەرگە الساق, وندا مۇسىلمان بالاسىنىڭ قامشىنىڭ سابىنداي قىسقا عۇمىردا جيناعان ساۋابىنان بيٸك تاۋ تۇرعىزاتىنىن كٶزگە ەلەستەتۋگە بولادى.
يە, قادٸر تٷنٸنٸڭ قۇت-بەرەكەسٸ شەكسٸز. سەبەبٸ, قاسيەتكە تولى بۇل كەشتە جەر بەتٸنە سان مىڭداعان پەرٸشتەلەر تٷسەدٸ. پەرٸشتەلەر تٸپتٸ جەر بەتٸنە سىيماي, بٸر-بٸرٸنە سىعىلىسادى. اللا ەلشٸسٸنٸڭ (اللانىڭ وعان سالاۋاتى مەن سەلەمٸ بولسىن) كەلەسٸ بٸر حاديس-شاريفٸندە: «ول تٷنٸ جەر بەتٸنە تٷسكەن پەرٸشتەلەردٸڭ سانى ۇساق تاستاردىڭ سانىنان دا كٶپ», – دەپ حابارلايدى.
پەرٸشتەلەر مٷمٸندەردٸ اينالا قورشاي اللا تاعالانىڭ ولارعا دەگەن كەشٸرٸمٸ مەن مەيٸرٸمٸن ايتىپ سٷيٸنشٸلەيدٸ. اللا تاعالا قۇران كەرٸمدە:
سَلَامٌ هِيَ حَتَّى مَطْلَعِ الْفَجْرِ
«ول بەيبٸتشٸلٸك كەشٸ, تاڭ راۋانداعانعا دەيٸن جالعاسادى (قادٸر, 5) – دەپ باياندايدى.
قاسيەتتٸ تٷندٸ قۇلشىلىقپەن ٶتكٸزگەن مۇسىلمانعا پەرٸشتەلەر سالاۋات ايتىپ, وعان بەيبٸت ٶمٸر تٸلەيدٸ.
قادٸر تٷنٸندە اللا ريزاشىلىعى ٷشٸن عيبادات جاساپ, ناماز وقىپ, قۇلدىق سەزٸمدەردٸ ارتتىرۋ, قۇران كەرٸمدٸ وقىپ, تىڭداپ, تٷسٸنۋگە ىنتا قويۋ, مەشٸتكە بارىپ ۋاعىز-ناسيحات تىڭداۋ, جاببار حاققا تەۋبە مەن يستيعفار جاساۋ, اللا تاعالانى ۇلىقتاۋ, ەلٸمٸزدٸڭ بٸرلٸگٸ مەن يگٸلٸگٸ, جەر بەتٸندەگٸ كٷللٸ مۇسىلماندار ٷشٸن دەيٸم دۇعا جاساۋ – ساۋاپتى ھەم ابزال امالداردىڭ بٸرٸ.
قۇرمەتتٸ باۋىرلار!
قادىر تٷنٸنٸڭ مٷمكٸندٸگٸنەن ماقۇرىم قالماي, تاڭ راۋانداعان شاققا دەيٸن جانسەبٸل رۋحتا حاققا قۇلشىلىق قىلىپ, جان-جٷرەگٸمٸزبەن الاشتىڭ قامى ٷشٸن دۇعا-تٸلەك جاسايىق. اللا-تاعالا رامازاننان رامازانعا امان-ەسەن جەتٸپ, دەيٸم قاسيەتتٸ قادٸر تٷنٸن قارسى الا بەرۋدٸ جازسىن! ەمين!
باس مٷفتي سەرٸكباي قاجى وراز
