Qadirli jamaǵat!
Barshańyzǵa qasietti Qadir keshi múbárak bolsyn!
Alla Taǵala Haq Elshisine (Allanyń oǵan salaýaty men sálemi bolsyn):
لَيْلَةُ الْقَدْرِ خَيْرٌ مِّنْ أَلْفِ شَهْر
«Qadir túni myń aidan da qaiyrly» (Qadir, 2-3) – degen aiatty názil etip, musylman úmbetin teńdessiz qýanyshpen súiinshilegen.
Álbette, bul – Alla Taǵalanyń musylman úmbetine degen sheksiz qamqorlyǵy men raqymy. Óitkeni, myń aidy jyldarǵa shaǵatyn bolsaq, seksen úsh jyldan astam mezgildi qamtidy. Bul degenimiz – bir adamnyń ómirine tatityn ýaqyt mólsheri. Iaǵni, Qadir túninde Haq Taǵalaǵa ynty-shyntymen qulshylyq etken pende ǵumyr boiy qulshylyq etken bolyp sanalady. Al, ár jyl saiynǵy Qadir túnin qaperge alsaq, onda musylman balasynyń qamshynyń sabyndai qysqa ǵumyrda jinaǵan saýabynan biik taý turǵyzatynyn kózge elestetýge bolady.
Iá, Qadir túniniń qut-berekesi sheksiz. Sebebi, qasietke toly bul keshte jer betine san myńdaǵan perishteler túsedi. Perishteler tipti jer betine syimai, bir-birine syǵylysady. Alla Elshisiniń (Allanyń oǵan salaýaty men sálemi bolsyn) kelesi bir hadis-sharifinde: «Ol túni jer betine túsken perishtelerdiń sany usaq tastardyń sanynan da kóp», – dep habarlaidy.
Perishteler múminderdi ainala qorshai Alla Taǵalanyń olarǵa degen keshirimi men meiirimin aityp súiinshileidi. Alla Taǵala Quran Kárimde:
سَلَامٌ هِيَ حَتَّى مَطْلَعِ الْفَجْرِ
«Ol beibitshilik keshi, tań raýandaǵanǵa deiin jalǵasady (Qadir, 5) – dep baiandaidy.
Qasietti túndi qulshylyqpen ótkizgen musylmanǵa perishteler salaýat aityp, oǵan beibit ómir tileidi.
Qadir túninde Alla rizashylyǵy úshin ǵibadat jasap, namaz oqyp, quldyq sezimderdi arttyrý, Quran Kárimdi oqyp, tyńdap, túsinýge ynta qoiý, meshitke baryp ýaǵyz-nasihat tyńdaý, Jabbar Haqqa táýbe men istiǵfar jasaý, Alla Taǵalany ulyqtaý, elimizdiń birligi men igiligi, jer betindegi kúlli musylmandar úshin dáiim duǵa jasaý – saýapty hám abzal amaldardyń biri.
Qurmetti baýyrlar!
Qadyr túniniń múmkindiginen maqurym qalmai, tań raýandaǵan shaqqa deiin jansebil rýhta Haqqa qulshylyq qylyp, jan-júregimizben Alashtyń qamy úshin duǵa-tilek jasaiyq. Alla-Taǵala Ramazannan Ramazanǵa aman-esen jetip, dáiim qasietti Qadir túnin qarsy ala berýdi jazsyn! Ámin!
Bas múfti Serikbai qajy ORAZ
