قر دەنساۋلىق ساقتاۋ ۆيتسە-مينيسترٸ – باس مەملەكەتتٸك سانيتار دەرٸگەر ەرلان قيياسوۆ سايلاۋ پروتسەسٸندە كوروناۆيرۋس ينفەكتسيياسىنان ساقتانۋ الگوريتمٸن تٷسٸندٸردٸ, دەپ حابارلايدى قازاقپارات تٸلشٸسٸ.
«بٷگٸن ازاماتتار قر پارلامەنتٸ مەجٸلٸسٸ مەن مەسليحاتتار دەپۋتاتتارىنا داۋىس بەرۋدە. سايلاۋ بارىسىندا باس مەملەكەتتٸك سانيتار دەرٸگەردٸڭ قاۋلىسىمەن بەكٸتٸلگەن كوروناۆيرۋس ينفەكتسيياسى تارالۋىنىڭ الدىن الۋ الگوريتمٸ ساقتالۋى كەرەك. الگوريتمدە COVID-19 ينفەكتسيياسىنىڭ تارالۋىن شەكتەۋ جولدارى قاراستىرىلعان. سايلاۋ كوميسسييالارىنىڭ قىزمەتٸن ۇيىمداستىرۋدا, سايلاۋ ۋچاسكەسٸندە داۋىس بەرۋ پروتسەسٸندە, سايلاۋ ۋچاسكەسٸنەن تىس جەردە داۋىس بەرۋ بارىسىندا, سايلاۋ ۋچاسكەسٸندە داۋىستاردى ساناعاندا, باقىلاۋشىلار مەن سەنٸمدٸ تۇلعالارعا قويىلاتىن تالاپ ەلەۋمەتتٸك اراقاشىقتىق ساقتالۋى تيٸس», - دەدٸ ۆيتسە-مينيستر.
ونىڭ ايتۋىنشا, سايلاۋ كوميسسيياسىنىڭ جۇمىسىن ۇيىمداستىرۋ بارىسىندا سايلاۋ كوميسسييالارىنىڭ مٷشەلەرٸ, بايقاۋشىلار, سەنٸم بٸلدٸرٸلگەن تۇلعالار ۋچاسكەدە ماسكا رەجيمٸن ساقتاۋى, 3 ساعات سايىن ماسكانى اۋىستىرىپ وتىرۋى قاجەت. قولمەن امانداسۋعا, كەلگەن ادامدارمەن جاقىن بايلانىسۋعا بولمايدى. سايلاۋ ٶتەتٸن جەردٸ جيٸ تازالاپ وتىرۋ كەرەك. جيھازدار 1,5-2 مەتر اراقاشىقتا ورنالاستىرىلعانى جٶن.
«سايلاۋ ۋچاسكەسٸنە كەلگەن سايلاۋشىدا مەديتسينالىق نەمەسە قورعانىش ماسكا, انتيسەپتيكالىق زات بولۋى قاجەت. بيۋللەتەن العاندا جەكە باستى كۋەلاندىراتىن قۇجاتتى كوميسسييا مٷشەسٸنٸڭ قولىنا بەرمەي اشىپ كٶرسەتۋ كەرەك. مٷمكٸندٸك بولسا سايلاۋعا ٶز قالامىڭىزبەن كەلگەن دۇرىس نەمەسە بولماعان جاعدايدا سايلاۋ كوميسسيياسى سٸزگە قالام بەرەدٸ. داۋىس بەرۋگە بالا ەرتٸپ كەلۋگە تىيىم سالىنادى», - دەدٸ ەرلان قيياسوۆ.
