پولشالىق ۋلترامارافونشى بارتلومەي كۋبكوۆسكيي تاريحتا العاش رەت بالتىق تەڭٸزٸن شۆەتسييادان پولشاعا دەيٸن جٷزٸپ ٶتتٸ. ول 160 شاقىرىمنان استام قاشىقتىقتى ەش توقتاۋسىز 55 ساعاتتا ەڭسەرٸپ, ادام تٶزگٸسٸز سىناققا تٶتەپ بەردٸ, دەپ حابارلايدى ult.kz.
سپورتشى مارافون بارىسىندا بٸر سەت تە ۇيىقتاماعان. سونىمەن قاتار حالىقارالىق اشىق سۋدا جٷزۋ ەرەجەلەرٸن قاتاڭ ساقتاپ, قاۋٸپسٸزدٸك ماقساتىندا قاتار جٷرگەن قايىققا بٸردە-بٸر رەت سٷيەنبەگەن. بۇل تالاپ ورىندالماعان جاعدايدا نەتيجە رەسمي تٷردە ەسەپكە الىنبايدى.
جارىستىڭ ەڭ اۋىر سەتٸ مەرەگە نەبەرٸ 1,5 شاقىرىم قالعاندا بولدى. ۇزاق ۋاقىت بويى سۋدا بولعاندىقتان كۋبكوۆسكييدٸڭ بويىنداعى كٷش-قۋاتى سارقىلىپ, جٷزۋٸ ايتارلىقتاي باياۋلاعان. سوعان قاراماستان, كومانداسىنىڭ ٷزدٸكسٸز قولداۋى مەن جانكٷيەرلەردٸڭ جٸگەرلەندٸرۋٸنٸڭ ارقاسىندا ول سوڭىنا دەيٸن كٷرەسٸپ, جاعالاۋعا امان-ەسەن جەتتٸ.
بۇل جٷزۋ تەك سپورتتىق رەكورد ورناتۋ ٷشٸن عانا ەمەس, قايىرىمدىلىق ماقساتىندا ۇيىمداستىرىلدى. اكتسييا بارىسىندا ونكولوگييالىق دەرتپەن كٷرەسٸپ جاتقان بالالارعا كٶمەك كٶرسەتەتٸن قورعا 560 مىڭ زلوتىيدان استام (شامامەن 160 ميلليون تەڭگە) قارجى جينالدى.
وسىلايشا, بارتلومەي كۋبكوۆسكيي بالتىق تەڭٸزٸن شۆەتسييادان پولشاعا دەيٸن جٷزٸپ ٶتكەن العاشقى ادام رەتٸندە تاريحقا ەنٸپ قانا قويماي, مىڭداعان ادامنىڭ ٶمٸرٸنە ٷمٸت سىيلايتىن يگٸ ٸسكە دە ٷلەس قوستى.
