«بالالار پايدالى استى جەمەي, ىسىراپ كٶبەيٸپ جاتىر»: جۋرناليست مەكتەپ اسحانالارىنداعى تاماق مەسەلەسٸن كٶتەردٸ

فوتو: قر وام

جۋرناليست جازيرا بەگالى مەكتەپ اسحانالارىنداعى تاماقتانۋ جٷيەسٸنە قاتىستى ٶزەكتٸ مەسەلەنٸ كٶتەردٸ. ونىڭ ايتۋىنشا, مەزٸرگە ەنگٸزٸلگەن پايدالى دەگەن تاعامداردى وقۋشىلاردىڭ باسىم بٶلٸگٸ جەمەيدٸ, نەتيجەسٸندە ٷلكەن كٶلەمدە ازىق-تٷلٸك ىسىراپ بولىپ جاتىر, دەپ حابارلايدى Ult.kz.

بالالار سارى بۇرشاق پيۋرەسٸن 98% جەمەيدٸ

اسحانا قىزمەتكەرلەرٸمەن كەزدەسكەن جۋرناليستٸڭ ايتۋىنشا, سارى تٷستٸ بۇرشاقتان دايىندالاتىن پيۋرەنٸ بالالاردىڭ 98 پايىزى قابىلدامايتىن كٶرٸنەدٸ.

«بالانىڭ پايدالى تاماققا داعدىلانۋى تۋعاننان, وتباسىنان باستالۋى كەرەك. بٸراق كٶپتەگەن وتباسىندا قايناتىلعان, بۇقتىرىلعان تاعام جەي بەرمەيدٸ. مايلى, قۋىرىلعان استى قالايدى», – دەيدٸ ول.

«سورپا – ناۋقاستىڭ اسى» دەيتٸندەر بار

جازيرا بەگالى قوعامداعى تاماققا دەگەن كٶزقاراستىڭ دا ٷلكەن رٶل اتقاراتىنىن ايتتى.

«كەيبٸر ەر ادامدار سۇيىق تاماق ٸستەۋگە تىيىم سالادى. «سورپا – اۋرۋ ادامنىڭ تاماعى» دەيدٸ. ٷنەمٸ قۋىرىلعان, مايلى تاماق دەنساۋلىققا زييان ەكەنٸن ەلەمەيدٸ», – دەيدٸ جۋرناليست.

مەكتەپ اسحاناسىندا مىڭ بالاعا ۇنايتىن مەزٸر دايىنداۋ مٷمكٸن بە?

ونىڭ ايتۋىنشا, كەيبٸر بالالار كارتوپ, سەبٸز, كاپۋستا جەمەيدٸ, قوي ەتٸنەن باس تارتادى, تاۋىق ەتٸنەن جيٸركەنەدٸ, تەك ماكارون جەگٸسٸ كەلەدٸ.

«مەكتەپ اسحاناسى كٷنٸنە مىڭ بالاعا جەكە-جەكە ۇنايتىن تاماق دايىنداي الا ما?» – دەپ سۇراق قويدى ول.

جۋرناليست مەكتەپ اسحانالارىندا جيٸ جانجال شىعاتىنىن ايتتى.

• اتا-انالار مەزٸرگە نارازى

• اسحانا مەڭگەرۋشٸلەرٸ تاماق قالدىقتارىنان زارداپ شەگەدٸ

• كەسٸپكەرلەر شىعىنعا باتادى

• ازىق-تٷلٸك باعاسى قىمبات

«پيياز, كاپۋستا, گوروح جەمەيتٸن بالانى مەجبٷرلەۋ مٷمكٸن ەمەس. لوقسىپ, قۇسىپ تاستايدى. اسحانا قىزمەتكەرلەرٸ ەڭبەگٸنٸڭ زايا كەتكەنٸنە قىنجىلادى», – دەيدٸ ول.

ماماندار قۇنارلى ازىق ەنگٸزۋگە تىرىسادى, بٸراق نەتيجە جوق

جازيرا بەگالى بۇل مەسەلەنٸ ٷستٸرت ەمەس, تەرەڭ تالداۋ قاجەت ەكەنٸن ايتتى.

«مەزٸردٸ ماماندار دايىندايدى, بٸراق ولار اسحاناداعى شىنايى جاعدايدى بٸلە مە?» – دەپ ساۋال تاستادى.

جۋرناليستٸڭ قورىتىندىسى:

• مەكتەپتٸڭ مٸندەتٸ – بٸلٸم بەرۋ, بٸراق تاماق مەسەلەسٸ دە ماڭىزدى.

• ىستىق تاماققا قاتىستى داۋ توقتاماي كەلەدٸ.

• بالالار مەكتەپ اسىن جەمەي, سىرتتان سامسا, بۋرگەر, دونەر, پيتستسا جەيدٸ.

• دەمالىس كٷندەرٸ فاستفۋد ساتاتىن كافەلەر لىق تولى.

«بۇل مەسەلەگە نٷكتە قويۋ كەرەك. جاي عانا تالاپ ەمەس, ناقتى زەرتتەۋ, جٷيەلٸ شەشٸم قاجەت», – دەپ تٷيٸندەدٸ ول.