بيزنەسكە جازالاۋدىڭ ورنىنا ەسكەرتۋ ينستيتۋتى كەڭٸنەن قولدانىلادى. بۇل تۋرالى قر پارلامەنتٸ پالاتالارىنىڭ بٸرلەسكەن وتىرىسىندا قارجى مينيسترٸ باقىت سۇلتانوۆ مەلٸم ەتتٸ, دەپ حابارلايدى ۇلت.كز تٸلشٸسٸ قازاقپارات اگەنتتٸگٸنە سٸلتەمە جاساپ.
«2016 جىلعا ارنالعان بيۋدجەتتٸڭ اتقارىلۋى جۇمىس ورىندارىن اشۋ مەن كەسٸپكەرلٸكتٸ ىنتالاندىرۋ ارقىلى ەكونوميكانى جانداندىرۋعا باعىتتالعان بولاتىن. ەكونوميكانىڭ ٶسٸمٸ 1 پايىزدى قۇرادى. ول كٶلٸك سالاسىندا كٶرسەتٸلەتٸن قىزمەتتەردٸڭ كٶلەمٸنٸڭ ٶسۋٸ, اۋىل شارۋاشىلىعىندا, قۇرىلىستا, ونىڭ ٸشٸندە تۇرعىن-ٷي قۇرىلىسىندا, ٶنٸم شىعارۋدىڭ ۇلعايۋى ەسەبٸنەن قامتاماسىز ەتٸلدٸ.
بيۋدجەتتٸڭ كٸرٸستەرٸ 7,7 ترلن. تەڭگەگە جەتتٸ. بۇل 2015 جىلدىڭ كٶرسەتكٸشتەرٸنەن 1,5 ترلن. تەڭگەگە كٶپ. ونىڭ 30 پايىزى ترانسفەرتتەرگە كەلەدٸ. بيۋدجەت كٸرٸستەرٸنٸڭ ەلٸ دە بولسا ۇلتتىق قوردان تارتىلاتىن ترانسفەرتتەر مەن ەلەمدٸك شيكٸزات نارىعى كونيۋنكتۋراسىنىڭ ٶزگەرۋٸنە تەۋەلدٸلٸگٸ تۋرالى سٸزدەردٸڭ ايتقان ەسكەرتۋلەرٸڭٸز ورىندى. سوندىقتان, ەكونوميكانىڭ ٶسۋٸ مەن ەرٸ قاراي دامۋى ٷشٸن بٸراز شارالار جوسپارلانىپ وتىر. بۇل جوسپاردىڭ نەتيجەلٸ بولۋى ٷشٸن بٸز بيزنەسكە قولايلى جاعداي جاساپ, سالىق تٷسٸمدەرٸنٸڭ جوعارى قايتارىلىمىن ساقتاپ قالۋىمىز كەرەك. «كٸرٸس كٸرمەي - شىعىس شىقپايدى» دەگەن مەتەل بار.بۇل رەتتە, جۇمىسىمىز سالىقتىق تٷسٸمدەردٸ ۇلعايتۋ مەن بيزنەسكە ەكٸمشٸلٸك قىسىمداردى ازايتۋ اياسىندا ٶتەدٸ. مەسەلەن, ٷستٸمٸزدەگٸ جىلى سالىقتىق تەكسەرۋلەردٸ 37,5 پايىزعا قىسقارتامىز. بۇدان باسقا, جاڭا سالىق كودەكسٸ جوباسىندا وسى تەكسەرۋلەرگە سەبەپ بولاتىن نەگٸزدەمەلەردٸڭ 56 پايىزى الىنىپ تاستالادى. سونىمەن, قازٸرگٸ 32 نورمانىڭ 14-ٸ عانا قالاتىن بولادى», - دەپ توقتالدى مينيستر.
ونىڭ سٶزٸنە قاراعاندا, جالپى سالىقتىق تەكسەرۋلەردە گوريزونتالدى مونيتورينگ ەنگٸزٸلەدٸ. ول سەنٸم, اشىقتىق جەنە ٶزارا تيٸمدٸ پرينتسيپتەرٸ بويىنشا قولدانىلادى. سالىقتىق ەكٸمشٸلەندٸرۋدەگٸ قىزمەتتەردٸ ودان ەرٸ اقپاراتتاندىرۋ دا وسى جۇمىسقا وڭ ىقپالىن تيگٸزەدٸ.
«قاراستىرىلىپ جاتقان ماڭىزدى مەسەلەنٸڭ تاعى بٸرٸ - ول تيٸمسٸز سالىقتىق پرەفەرەنتسييالاردىڭ سانىن قىسقارتۋ. ٶزدەرٸڭٸزگە بەلگٸلٸ, وسى جەڭٸلدٸكتەر بيزنەسپەن كٶبٸنەسە سالىق تٶلەۋدٸڭ مٶلشەرٸن ازايتۋ ٷشٸن عانا قولدانىلادى. وسىعان بايلانىستى قوسىلعان قۇن, كورپوراتيۆتٸك تابىس سالىقتارى جەنە دە جەرگٸلٸكتٸ سالىقتار بويىنشا قولدانىستاعى جەڭٸلدٸكتەر قايتادان قارالادى. بۇدان باسقا, ەكٸمشٸلٸك قۇقىق بۇزۋشىلىق كودەكسٸنە گۋمانيزاتسييا اياسىندا تيٸستٸ ٶزگەرٸستەر ەنگٸزٸلۋ قاراستىرىلۋدا. ونىڭ ەڭ باستىسى - ول ەكٸمشٸلٸك ايىپپۇلدىڭ كٶلەمٸن قىسقارتۋ مەن جازالاۋدىڭ ورنىنا ەسكەرتۋ ينستيتۋتىن كەڭٸنەن قولدانۋ», - دەدٸ ب. سۇلتانوۆ.
