باعلان مايلىباەۆ پەن نيكولاي گاليحيننٸڭ قاماۋ مەرزٸمٸ ۇزارتىلدى, - دەپ حابارلايدى Tengrinews.kz تٸلشٸسٸ سوتتىڭ باسپاسٶز قىزمەتٸنە سٸلتەمە جاساپ.
"7 ناۋرىزدا استانانىڭ № 2 ەسٸل اۋداندىق سوتى پرەزيدەنت ەكٸمشٸلٸگٸ باسشىسىنىڭ بۇرىنعى ورىنباسارى باعلان مايلىباەۆ پەن پرەزيدەنت ەكٸمشٸلٸگٸندەگٸ ٸشكٸ ساياسات بٶلٸمٸ مەڭگەرۋشٸسٸنٸڭ ورىنباسارى نيكولاي گاليحيننٸڭ قاماۋ مەرزٸمٸن 12 مامىرعا دەيٸن ۇزارتتى", - دەدٸ استانا سوتىنىڭ باسپاسٶز قىزمەتٸندەگٸلەر.
ەسكە سالا كەتەيٸك, باعلان مايلىباەۆ 16 قاڭتاردا قاماۋعا الىنعان بولاتىن. قر ۇلتتىق قاۋٸپسٸزدٸك كوميتەتٸ مايلىباەۆتى قازاقستان رەسپۋبليكاسى قىلمىستىق كودەكسٸنٸڭ 185-بابى 1, 3-بٶلٸگٸندە كٶزدەلگەن ("مەملەكەتتiك قۇپييالاردى زاڭسىز جيناۋ, تاراتۋ, جارييا ەتۋ") قىلمىستاردى جاسادى دەگەن كٷدٸكپەن ۇستاعان ەدٸ. سونداي-اق, مەملەكەتتٸك قۇپييانى جارييالادى دەگەن كٷدٸكپەن قر پرەزيدەنتٸ ەكٸمشٸلٸگٸنٸڭ قىزمەتكەرٸ نيكولاي گاليحين ۇستالعان بولاتىن.
