جەر رەفورماسى جٶنٸندەگٸ كوميسسييانىڭ بٸرٸنشٸ وتىرىسىندا مەجٸلٸس دەپۋتاتى ايدوس سارىم جايىلىم, شابىندىققا قاتىستى زاڭناماعا كەسٸبي تالداۋ جاساۋدى ۇسىندى, دەپ حابارلايدى قازاقپارات.
«بٷگٸنگٸ وتىرىسقا كەلگەن ادامنىڭ كٶپشٸلٸگٸ بٸرٸنشٸ جەر كوميسسيياسىنىڭ جۇمىسىنا قاتىسقان. سول كوميسسييانىڭ ارتىقشىلىعى مەن كەمشٸلٸگٸن كٶردٸك, تەجٸريبە جيناقتالدى. سوندىقتان ەڭ بٸرٸنشٸ ٷلكەن ۇسىنىس – سول جەر كوميسسيياسىنىڭ نەگٸزگٸ حاتتاماسىندا جاسالعان باعىتتار بويىنشا مينيسترلٸك (اۋىل شارۋاشىلىعى مينيسترلٸگٸ) ەسەپ دايىنداسا. تيٸس شەشٸمدەر قابىلداندى نەمەسە «مىنا ۇسىنىستار نەگە قىبىلدانبادى» دەگەن ەسەپ بولۋى كەرەك. ٶيتكەنٸ اتقارىلعان جۇمىستىڭ نەتيجەسٸ بولۋى كەرەك قوي?!», - دەدٸ دەپۋتات.
بۇدان بٶلەك سارىم اقپارات پەن كاداستر مەسەلەسٸنە توقتالدى.
«ول دا سٶزسٸز كەرەك, سەبەبٸ سەنٸم بولماي, جەر مەسەلەسٸندە ەشقانداي ٶزگەرٸس جاسالمايتىنىن انىق كٶرٸپ وتىرمىز. سونىمەن قاتار, «اۋىل شارۋاشىلىعى جەرلەرٸ, جايىلىم, شابىندىققا قاتىستى نەگە زاڭدار مەن قابىلدانعان باپتار جۇمىس ٸستەمەي جاتىر» دەگەن كەسٸبي تالداۋ جاساساق. كەرەك بولسا, ايماقتارعا شىعىپ, ەل ارالاپ, ارتىقشىلىعى مەن كەمشٸلٸگٸن كٶزٸمٸزبەن كٶرٸپ, وسى تۋرالى كەشەندٸ جاڭا زاڭ جوباسىن دايىندايتىن مٷمكٸندٸك بولسا», - دەدٸ دەپۋتات.
