اياگٶزدەگٸ اپات ورنىنا شىعىس قازاقستان وبلىسىنىڭ ەكٸمٸ دانيال احمەتوۆ بارىپ, تۇرعىندارمەن كەزدەستٸ. تاسقىننان زارداپ شەككەن وتباسىلارعا تۇرمىستىق كٶمەك كٶرسەتۋ ٷشٸن 50 ملن تەڭگە بٶلٸنەتٸن بولدى, دەپ حابارلايدى قازاقپارات تٸلشٸسٸ.
تاسقىننان قيراعان ٷيلەردٸ ارالاپ, تۇرعىندارمەن كەزدەسكەن وبلىس ەكٸمٸ ەۋەلٸ ەل اراسىندا تاراعان الىپقاشپا ەڭگٸمەلەرگە قاتىستى تٷسٸنٸك بەردٸ. اياگٶز قالاسىنا جايىلعان سۋدىڭ سۋ قويماسىنان جەتكەنٸ تۋرالى اقپاراتتىڭ انىق-قانىعىن بٸلۋ ٷشٸن ماماندار تٸكۇشاقپەن اۋماقتى زەرتتەيتٸن بولدى. ونىڭ نەتيجەسٸ ەرتەڭ كەشكە قاراي بەلگٸلٸ بولۋى تيٸس.
ال باسپاناسى قيراپ, وتىن-سۋسىز قالعان حالىققا كٶمەك رەتٸندە 50 ملن تەڭگە بٶلٸنەتٸن بولدى.
ەكٸمنٸڭ ساپارى بارىسىندا قالا بويىنشا 8 ٷيدٸڭ جەرمەن-جەكسەن بولىپ, 10 ٷيدٸڭ اپاتتىق جاعدايعا تٷسكەنٸ انىقتالدى. 148 ٷيگە سۋ كٸرگەن. ٷيسٸز قالعان وتباسىلارعا قالانىڭ باسقا بٶلٸگٸندە سالىنىپ جاتقان 60 پەتەرلٸ ٷيدەن جاڭا باسپانا بەرٸلۋٸ مٷمكٸن ەكەنٸ دە ايتىلدى.
«قازٸر بۇل مەسەلەگە بايلانىستى ارنايى كوميسسييا جۇمىس ٸستەپ جاتىر. ولار ٶز جۇمىسىن 10-15 كٷننٸڭ ٸشٸندە اياقتايدى. سوندىقتان, تۇرۋعا جارامسىز بولىپ قالعان ٷيلەردٸڭ سانى 18-دەن كٶپ بولۋى مٷمكٸن. قالاي بولعاندا دا, ەشكٸم كٶمەكسٸز قالمايدى. بارلىق تۇرعىندارعا تيٸستٸ كٶمەك كٶرسەتٸلەدٸ. ەشكٸم كٶمەكسٸز قالمايدى» - دەدٸ وبلىس ەكٸمٸ.
