فوتو: primeminister.kz
اۋىل شارۋاشىلىعى مينيسترٸ قىزمەتٸنە ايداربەك ساپاروۆ تاعايىندالدى, دەپ حابارلايدى "ۇلت اقپارات" اقوردانىڭ باسپاسٶز قىزمەتٸنە سٸلتەمە جاساپ.
"مەملەكەت باسشىسىنىڭ جارلىعىمەن ايداربەك سەيپٸلۇلى ساپاروۆ قازاقستان رەسپۋبليكاسىنىڭ اۋىل شارۋاشىلىعى مينيسترٸ بولىپ تاعايىندالدى, ول بۇرىنعى اتقارعان لاۋازىمىنان بوساتىلدى", - دەلٸنگەن حابارلامادا.
بۇل رەتتە پرەزيدەنت جارلىعىمەن ەربول شىراقپايۇلى قاراشٶكەەۆ قازاقستان رەسپۋبليكاسىنىڭ اۋىل شارۋاشىلىعى مينيسترٸ لاۋازىمىنان بوساتىلدى.
ايداربەك سەيپٸلۇلى ساپاروۆ 1966 جىلى 12 ماۋسىمدا سولتٷستٸك قازاقستان وبلىسىندا دٷنيەگە كەلگەن.
ومبى اۋىلشارۋاشىلىعى ينستيتۋتىن (1992), ماناش قوزىباەۆ اتىنداعى سولتٷستٸك قازاقستان مەملەكەتتٸك ۋنيۆەرسيتەتٸن (2006) زووينجەنەر ماماندىعى, سونداي-اق مەملەكەتتٸك باسقارۋ باكالاۆرى بويىنشا تەمامداعان.
ەرتٷرلٸ جىلدارى "ازىق-تٷلٸك كەلٸسٸمشارت كورپوراتسيياسى" اق سولتٷستٸك قازاقستان وبلىستىق فيليالى ديرەكتورىنىڭ ورىنباسارى, اۋىل شارۋاشىلىعى مينيسترلٸگٸنٸڭ سقو باسقارماسىنىڭ باسشىسى, سقو وبلىستىق اۋماقتىق ينسپەكتسيياسىنىڭ باسشىسى, سقو شال اقىن اۋدانىنىڭ ەكٸمٸ, ماعجان جۇماباەۆ اۋدانىنىڭ ەكٸمٸ, سقو ەكٸمٸنٸڭ اۋىل شارۋاشىلىعى جٶنٸندەگٸ ورىنباسارى, سقو ەكٸمٸنٸڭ بٸرٸنشٸ ورىنباسارى قىزمەتتەرٸن اتقاردى.
2019 جىلى اۋىل شارۋاشىلىعى مينيسترٸنٸڭ بٸرٸنشٸ ورىنباسارى بولىپ تاعايىندالدى.
ال 2022 جىلعى 1 جەلتوقساننان بٷگٸنگٸ كٷنگە دەيٸن سولتٷستٸك قازاقستان وبلىسىنىڭ ەكٸمٸ بولدى.
