فوتو: اتىراۋ وبلىستىق تج دەپارتامەنتٸ
اتىراۋدا مۇناي قالدىعى بار تەمٸرجول تسيستەرناسى جارىلىپ, تسەح قابىرعاسى قۇلادى, دەپ حابارلايدى Kazinform.
وبلىستىق تٶتەنشە جاعدايلار دەپارتامەنتٸنٸڭ قوعاممەن بايلانىس توبى اتالعان دەرەكتٸ راستادى.
«بٷگٸن, 14 جەلتوقساندا جەرگٸلٸكتٸ ۋاقىتپەن ساعات 13:58-دە اتىراۋ قالاسىنداعى وڭتٷستٸك ٶندٸرٸستٸك ايماقتا ورنالاسقان «Batys Petroleum» جشس-نە تيەسٸلٸ №1 تسەحتىڭ جۋۋ-بۋلاۋ ستانتسيياسىندا جىلجىمالى تەمٸر جول قۇرامىنا تازالاۋ جٷرگٸزٸلگەن. سول كەزدە مۇناي شلامىنىڭ قالدىعى بار تسيستەرنادا گاز-اۋا قوسپاسىنىڭ دٷمپۋٸ بولعان. سونىڭ سالدارىنان تسەح قۇرىلىمى ٸشٸنارا قۇلاعان. جالىننىڭ تۇتانۋىنا بايلانىستى اۆتوماتتى ٶرت سٶندٸرۋ قۇرىلعىسى ٸسكە قوسىلعان. «سەمسەر-ٶرت سٶندٸرۋشٸ» جشس ٶرت سٶندٸرۋ بٶلٸمشەلەرٸ ٶرت سٶندٸرۋ جۇمىستارىن جٷرگٸزدٸ», - دەدٸ دەپارتامەنتتٸڭ قوعاممەن بايلانىس توبى.
وقيعا ورنىنا اتىراۋ وبلىستىق تٶتەنشە جاعدايلار دەپارتامەنتٸنەن 48 قىزمەتكەر مەن 5 تەحنيكا, «اپاتتار مەديتسيناسى» ورتالىعىنان 3 قىزمەتكەر, 1 تەحنيكا, «سەمسەر-ٶرت سٶندٸرۋشٸ» جشس-نٸڭ 5 قىزمەتكەرٸ مەن 1 تەحنيكاسى جۇمىلدىرىلدى.
تٶتەنشە جاعدايلار دەپارتامەنتٸنٸڭ قىزمەتكەرلەرٸ بارلاۋ جۇمىستارىن جٷرگٸزدٸ. ەشكٸم زارداپ شەكپەگەن.
